Бидний өдөр тутмын болон насан туршийн амьдралд бүртгэл салшгүй уялдаа холбоотой байдаг билээ. Тэгвэл бүртгэлийн гол үндэс мэдээж хууль эрх зүйн харилцаа юм.
Тийм ч учраас улсын бүртгэлийн ерөнхий болон бүртгэлийн хууль тогтоомж, тэр дундаа Иргэний бүртгэлийн тухай хуулийг иргэдэд сурталчлах, танин мэдэхүйн мэдээлэл хүргэх, эрх зүйн мэдлэг олгох зорилгоор тус газар “Танд тусалъя” аяныг 3 дугаар сарын 25-29-ний өдрүүдэд нийслэлийн хэмжээнд өрнүүлэв. Энэ хүрээнд нийслэлийн ерөнхий боловсролын зургаан сургууль, хоёр нэгдсэн эмнэлэг, томоохон үйлчилгээний дөрвөн төвтэй хамтран зохион байгуулж иргэд болон сурагчдад “Иргэний бүртгэлтэй холбоотой хууль тогтоомжийг сурталчлах “ сэдвийн дагуу явуулсан нь нилээд үр дүнтэй арга хэмжээ боллоо. Учир нь хамрагдсан иргэд энэ үеэр өдөр тутмын амьдралд хамгийн ойр тулгардаг асуудлаар мэдээлэл, зөвлөгөө өгсөнд талархалтай байгаагаа илэрхийлж байлаа. Мөн төгсөх ангийн сурагчид бид бүртгэлийн талаарх мэдээллийг тэр бүр очиж аваад байж чаддаггүй, баримт бичгийн талаарх мэдээлэл бидэнд хомс, ойголтгүй байдаг байсан. Харин өнөөдөр бүртгэлийн байгууллагын ах, эгч нар биечлэн ирж сургалт зохион байгуулж, баримт бичиг болоод бүртгэлийн хууль тогтоомжийн талаар бидэнд тодорхой ойлголт, мэдээлэл өгсөнд баяртай байна гэж байлаа. Уг арга хэмжээнд нийт 2388 иргэнийг хамруулсан бөгөөд тэдэнд иргэний бүртгэлтэй холбоотой хуулийн зүйл заалтыг нэг бүрчлэн тайлбарлах, бүртгэлийн байгууллагын үйл ажиллагаа, үйлчилгээний талаар мэдээлэл өгөх, улмаар Нэг иргэн -Нэг бүртгэлтэй байхын ач тусыг сурагчдад ойлгуулан таниулж сурталчлах, 16 нас хүрч цахим үнэмлэх шинээр авхад юу бүрдүүлэх болон иргэний бусад бүртгэлтэй холбоотой мэдээлэл зөвлөгөө өгч, иргэний бүртгэлтэй холбоотой хуулийн зүйл заалтыг тусгасан гарын авлага, материал зэргийг тарааж өгсөн. Улсын бүртгэлийн ерөнхий газраас иргэн, эд хөрөнгө, хуулийн этгээдийн бүртгэлийн хууль тогтоомжийг иргэд, олон нийтэд сурталчлах зорилготой эрх зүйн албан бус сургалтыг цаашид илүү өргөн цар хүрээтэй цогц байдлаар үргэлжлүүлэн зохион байгуулж, хэрэгжүүлэхээр төлөвлөж байна.
