Улсын бүртгэлийн ажилтны өдрийг тохиолдуулан бүртгэлийн бүх шатны байгууллагад зүтгэж явсан үе үеийн ахмадууд, эдүгээ энэ албанд бие сэтгэл, мэдлэг чадвараа дайчлан ажиллаж байгаа бүртгэлийн ажилтан, албан хаагчид, тэдгээрийн гэр бүлийнхэн, хамтран ажилладаг байгууллага, хамт олон Та бүхэнд чин сэтгэлийн мэндчилгээ дэвшүүлье.
Монгол Улсад төрийн бүртгэл, мэдээллийн тогтолцоог шинэтгэх, цахим мэдээллийн нэгдсэн сан байгуулах, Монгол Улсын иргэний эрхийг баталгаажуулах, төрийн үйлчилгээг иргэдэд шуурхай хүргэх, төрийн үйлчилгээний шинэ орчныг бүрдүүлэх ажлын хүрээнд иргэний цахим мэдээлэл бүхий Монгол Улсын иргэний үнэмлэхийг бий болгон иргэдэд олгох арга хэмжээг үе шаттай хэрэгжүүлэн ажиллаж байгаа бөгөөд улсын хэмжээнд нийт иргэнийхээ 98 орчим хувийг цахим үнэмлэхжүүлсэн ажлын их амжилтаар «Улсын бүртгэлийн ажилтны өдөр»-өө угтаж байна. Шинэчилсэн иргэний үнэмлэх олгох үйл ажиллагааг хуульд заасан чиг үүргийн дагуу Улсын бүртгэлийн ерөнхий газар зохион байгуулж байгаа бөгөөд энэ үйл ажиллагааг тогтоосон хугацаанд амжилттай зохион байгуулахад улсын бүртгэлийн байгууллагын ажилтан, албан хаагчдын үүрэг хариуцлага, орон нутгийн удирдлага, байгууллагын дэмжлэг туслалцаа, нийт иргэдийн идэвх, оролцоо их байсныг цохон тэмдэглэж байна. Мөн энэ онд Улсын Их Хурлын болон Аймаг, сум, дүүргийн иргэдийн Төлөөлөгчдийн Хурлын сонгуулийн үйл ажиллагаа тохиосон бөгөөд бүртгэлийн байгууллагын ажилтан, албан хаагч та биднийг сонгуулийн үйл ажиллагаанд хуулиар хүлээсэн үүргээ хариуцлагатай, чин шударгаар биелүүлж ажиллахыг давхар шаардсан нөр их хөдөлмөрийн жил байлаа. Улсын Их Хурлын болон Аймаг, сум, дүүргийн иргэдийн Төлөөлөгчдийн Хурлын сонгуулийн тухай хуулиар бүртгэлийн байгууллага нь сонгогчдын нэрийн жагсаалтыг иргэний бүртгэл, мэдээллийн улсын санд үндэслэн гаргаж, сонгуулийн санал авах өдөр сонгогчийн иргэний үнэмлэх, хурууны хээг иргэний бүртгэл, мэдээллийн улсын сан дахь сонгогчийн бүртгэлтэй тулган үзэж, сонгогчийн бүртгэлийн хуудас олгох зэрэг ажлыг улсын хэмжээнд амжилттай зохион байгуулж ажиллалаа. Шинэчилсэн иргэний үнэмлэх нь Монгол Улсын бүртгэл, мэдээллийн нэгдсэн тогтолцооны бүхий л салбар, түвшинг хамарч, төрийн үйлчилгээний үндсэн суурь болох бөгөөд бүртгэлийн системийг сайжруулах, цахим засаглалын суурийг тавих, иргэний эрхийг хангахад чухал ач холбогдолтойн хувьд бид иргэдийг богино хугацаанд үнэмлэхжүүлэн, Аймаг, сум, дүүргийн иргэдийн Төлөөлөгчдийн Хурлын сонгуулийн санал өгөх ажиллагаанд анх удаа ашиглан, хэрэглээнд нэвтрүүлж чадлаа. Түүнчлэн өнгөрсөн хугацаанд бүртгэлийн байгууллагын ажлыг ил тод болгож, үйлчилгээг түргэн шуурхай хүргэх, иргэд, аж ахуйн нэгж, төрийн байгууллагуудын хамтын ажиллагааг хангах, оролцоог нэмэгдүүлэхэд мэдээллийн технологи, харилцаа холбооны дэвшилтэт технологийг ашиглах, цахим засаглалын суурийг тавих ажлын хүрээнд эд хөрөнгийн болон хуулийн этгээдийн бүртгэлийн системийг шинэчлэх ажлыг эхлүүллээ. Улсын бүртгэлийн ажилтан Та бид ойрын хугацаанд иргэний, эд хөрөнгийн болон хуулийн этгээдийн бүртгэлийн архивыг цахимжуулах, улсын бүртгэл мэдээллийн нэгдсэн цахим санг үүсгэх, улсын бүртгэлийн үйлчилгээг хялбаршуулж боловсронгуй болгох, орон нутгийн бүртгэлийн үйл ажиллагааг бэхжүүлэх зэрэг олон зорилтуудыг хамтдаа амжилттай хэрэгжүүлнэ гэдэгт миний бие итгэл дүүрэн байна. «Улсын бүртгэлийн ажилтны өдөр»-ийг тохиолдуулан бүртгэлийн бүх шатны байгууллагын нийт албан хаагчид, тус байгууллагын түүхийг бүтээлцсэн үе үеийн ахмадууд, бидэнтэй хамтран ажилладаг байгууллага, хамт олон Та бүхэнд эрүүл энх, аз жаргал, хамгийн сайн сайхан бүхнийг хүсэн ерөөе.
ДАРГЫН ҮҮРГИЙГ ТҮР ОРЛОН ГҮЙЦЭТГЭГЧ Ц.ПҮРЭВДОРЖ
