Монгол Улсын Ерөнхий сайдаас өгсөн үүрэг чиглэлийн дагуу тус газрын Тамгын газрын дарга Ч.Чанлуулодой, Бүртгэлийн газрын дарга Д.Энхцэцэг нар өчигдөр Дархан-Уул аймгийн Улсын бүртгэлийн хэлтсийн үйл ажиллагаатай биечлэн танилцаад ирлээ.

Тэд ажлаа Хонгор сумаас эхлүүлсэн. Тус суманд иргэний цахим үнэмлэх авах ёстой 4179 гаруй иргэн байгаагаас 3665 иргэний цахим үнэмлэх хэвлэгдэн ирж 3530 цахим үнэмлэх нь иргэдийнхээ гарт олгогдоод байгаа юм байна. Энэ нь олголтын явц 98 хувьтай гэсэн үг юм. Дарга нар тус сумын Улсын бүртгэгчийн өдөр тутмын ажилтай танилцсаны дараа бүртгэлийн ажлыг явуулахад гарч байгаа хүндрэл бэрхшээл байгаа эсэх талаар тодруулаад заавар, чиглэл өгч, тараагдаагүй байгаа цахим үнэмлэхийг нэн яаралтай иргэдийн гарт олгох арга хэмжээ авч ажиллахыг сануулсан. Хонгор сумаас хөдлөөд Дархан-Уул аймгийн Улсын бүртгэлийн хэлтэст ирсэнээр бидний дараагийн ажил эхэлсэн. Ажлын эхэнд тус аймгийн Улсын бүртгэлийн хэлтсийн дарга Болдбаатар хэлтсийнхээ болоод иргэний цахим үнэмлэхийн олголтын явцын талаар танилцуулга мэдээлэл хийв. Дархан-Уул аймагт хэвлэгдэж ирсэн нийт 63428 цахим үнэмлэхээс өнөөдрийн байдлаар 59399 цахим үнэмлэх иргэдийн гарт олгогдсон байгаа нь аймгийн хэмжээнд 94 хувьтай байна. Тус аймаг бусад аймгуудыг бодвол харьцангуй цөөхөн сумтай. Дархан, Орхон, Хонгор, Шарын гол сумдад цахим үнэмлэхийн явц 93-аас дээш хувьтай байна.

Аймгийн хэмжээнд тараагдааагүй үлдсэн иргэний цахим үнэмлэх 1555 байна. Үүнээс хилийн чанадад амьдарч байгаа 242, үндсэн хаяган дээрээ байхгүй 936, хугацаат цэргийн алба хааж байгаа 35, хорих ял эдэлж байгаа 14 иргэн байгаа талаар танилцууллаа. Тамгын газрын дарга Ч.Чанлуулодой хотод ойр, дээр нь бусад аймгуудыг бодвол цөөхөн сумтай аймгийн хувьд цахим үнэмлэхийн олголт хангалттай хэмжээнд хүрэхгүй байна гэж шүүмжлээд орон нутгийн сонгуулийн тухай хуулийг хэрэгжүүлэх, сонгуулийн насны нийт иргэдэд иргэний цахим үнэмлэхийг тараах нь нэн чухал гэдгийг онцлон хэлсэн. Хүн бүр хийх ёстой ажилдаа хариуцлагатай, санаачлагатай байх, тараагдаагүй үлдсэн цахим үнэмлэхийг өөрсдийн нөөц бололцоогоо ашиглан яаралтай иргэдэд олгох арга хэмжээ авч ажиллахыг тус аймгийн Улсын бүртгэлийн хэлтсийн даргад үүрэг болголоо. Мэдээлэл авч, үүрэг чиглэл өгсөнийхөө дараа тус хэлтсийн нэг цэгийн үйлчилгээний цонхны үйл ажиллагаатай болон улсын бүртгэгч нарын ажиллаж байгаа байр, орчин нөхцөл, өдөр тутмын ажилтай танилцсан юм.