УИХ-ын Хууль зүйн байнгын хорооныхон өнөөдөр тус газарт ажиллалаа. Орон нутгийн сонгуультай холбоотойгоор иргэдийн хаягийн бүртгэл болон бусад асуудлаар мэдээлэл авч, үйлчилгээний 1, 2 дугаар байраар орж өдөр тутмын үйл ажиллагаатай биечлэн танилцсан юм.

Өнөөдрийн байдлаар цахим үнэмлэхийн хэвлэлт 99,2 хувьтай байгаа бол олголтын тухайд улсын хэмжээнд 93,6 хувьтай байна. Цахим үнэмлэх хэвлэх ажил өнөөдрөөр дуусгавар болж байгаа талаар тус газрын дарга Ц.Пүрэвдоржид гишүүдэд танилцуулав. Гишүүдийн зүгээс энэ үеэр бүртгэлтэй холбоотой зарим асуудлаар холбогдох албаныхнаас асуулт тавьж хариулт, тодруулга авсан юм.Тухайлбал: Нийгмийн халамж хүрдэггүй хэсэг болох орон гэргүй, траншейны гэгдэх иргэдийг тодорхой халамж үйлчилгээ, хаяг тогтоох төвөөр дамжуулж бүртгэдэг. Энэ жилийн хувьд 600 гаруй иргэнийг Сонгинохайрхан дүүргийн “Амьдрах ухаан төв”-р дамжуулан бүртгээд байна.Гадаадын зарим иргэд монголын иргэн гэсэн үнэмлэхтэй байсан зөрчил байсан эсэхийг тодруулахад цахим үнэмлэхээр иргэдийг бүртгэснээс хойш энэ асуудал цэгцэрсэн. Үндсэндээ гадныхан Монгол улсын иргэний үнэмлэхтэй байх асуудалгүй болсоныг Бүртгэлийн газрын дарга Д.Энхцэцэг хэллээ. Харин гадаадад байгаа 37 мянган иргэн байгаа гэсэн албан тоо байдаг ч энэ нь төдийлөн бодитой тоо биш. Бүртгүүлээгүй иргэд олон байдаг бөгөөд зөвхөн Солонгос улсад 36 мянган иргэн байдаг гэсэн судалгаа байна. Эцэст нь гишүүдийн зүгээс орон нутгийн сонгууль дөхөж байгаа учраас хариуцлагатай ажиллах, ялангуяа өмнөх сонгуулиар гаргасан хаягийн зөрчил, давхардлыг давтах ёсгүй. Сонгогчийн бүртгэл нэгдсэн нэг л байх ёстой гэдгийг тус газрын удирдлагуудад сануулсан.