Монгол Улсын Засгийн газраас өнгөрсөн дөрвөн жилийн хугацаанд Засгийн газраас авч хэрэгжүүлсэн арга хэмжээ, үйл ажиллагаагаа танилцуулах зорилгоор “Ардын засаг-Ард түмэнтэйгээ хамт” аяныг өрнүүлж, энэ хүрээнд яам, агентлагууд долоо хоног тутам Нээлттэй өдөрлөгийг зохион байгуулж эхлээд байгаа билээ.

Тэгвэл энэ ажлын хүрээнд ХЗДХЯ-ны ээлжит Нээлттэй өдөрлөг өнөөдөр Сүхбаатарын талбайд боллоо. Нээлттэй өдөрлөгөөр тус яамны харья УБЕГ, ШШГЕГ, ЦЕГ, ОӨГ, ХХЕГ зэрэг бүхий л агентлагууд оролцож өнгөрсөн дөрвөн жилийн хугацаанд Засгийн газрын мөрийн хөтөлбөрийн хүрээнд хийж хэрэгжүүлсэн ажил гарсан үр дүнг иргэд, олон нийтэд сурталчлан таниулж, иргэдийн санал бодлыг сонсон, төрийн зарим үйлчилгээг газар дээрээс нь нэг цэгт хүргэх арга хэмжээ авч, мэдээлэл зөвлөгөө өгч ажиллав. Уг нээлттэй өдөрлөгөөр тус газар иргэдэд баримт бичиг, бүртгэлийн талаар зөвлөгөө өгөхөөс гадна www.burtgel.mn цахим хуудсанд хандаж, регистрийн болон иргэний үнэмлэхийн дугаараа хийж өөрийн мэдээллээ шалгах боломжийг хангаж өгөв. Мөн архивтай холбоотой асуудлаар үйлчилгээ авахаар ирсэн иргэдэд лавлагаа, гадаад паспортын мэдүүлгийн хуудас тарааж захиалгыг нь хүлээн авах, гадаад паспортын хугацаа сунгах зэрэг үйлчилгээг үзүүлж олны хөлд дарагдав. Түүнчлэн эд хөрөнгөтэй эсэх лавлагааны хариугаа аваагүй байгаа иргэдэд хариуг нь өгөх, гадаад паспорт сунгах, мэдүүлгийн хуудас хүлээн авах зэрэг үйлчилгээг үзүүлж олны хөл хөдөлгөөн ихтэй байлаа.