Улсын бүртгэлийн ерөнхий газар Монгол Улсын Засгийн газрын “Журам батлах тухай” 2007 оны 190 дүгээр тогтоол, Монгол Улсын Ерөнхийлөгчийн “Нээлттэй хаалганы өдрийг зохион байгуулж байх тухай” 2007 оны 97 дугаар зарлигийн дагуу Нээлттэй хаалганы өдрийг сар бүрийн хоёр дахь долоо хоногийн Бямба гариг бүр тогтмол зохион байгуулдаг уламжлалтай.

Энэ удаагийн ээлжит Нээлттэй хаалганы өдрөө өнөөдөр зохион байгуулж, төв, аймаг, нийслэлийн хэмжээнд тус газрын харьяа газар, хэлтсүүд бүрэн бүрэлдэхүүнээрээ ажиллаж архивын бүх төрлийн лавлагаа, гадаад паспортын захиалга хүлээн авах, сунгах, хүчингүй болгох зэрэг үйлчилгээг нийт 194 иргэнд үзүүллээ. Мөн иргэн, эд хөрөнгө, хуулийн этгээдийн бүртгэл, архивын болон баримт бичгийн зөрчил, түүнээс урьдчилан сэргийлэх чиглэлээр 68 иргэнд зөвлөгөө мэдээлэл өгч ажиллав. Улсын бүртгэлийн ерөнхий газар 2008-2012 оны 4 сарын байдлаар Нээлттэй хаалганы өдрийг нийт 38 удаа тасралтгүй зохион байгуулж энэ өдрүүдийн хүрээнд иргэн, хуулийн этгээд, эд хөрөнгийн бүртгэл болон архивын лавлагаатай холбоотой бүх төрлийн үйлчилгээг 35 мянга гаруй иргэнд үзүүлж, 4125 иргэний өргөдөл, гомдлыг хүлээн авч асуудлыг зохих журмын дагуу хугацаанд нь шийдвэрлэж өгөөд байна.