Монгол Улсын Засгийн газар өнгөрсөн 4 жилийн хугацаанд хийж бүтээсэн ажлаа ард иргэддээ танилцуулах зорилгоор “Ардын засаг- Ард түмэнтэйгээ” хамт аяныг өрнүүлж, энэ хүрээнд төрийн зарим яам, агентлагууд Нээлтэй хаалганы өдрийг өнгөрсөн баасан гаригт Сүхбаатарын талбайд зохион байгуулав.

Энэ үеэр Монгол Улсын Ерөнхий сайд С.Батболд, ХЗДХ-ийн сайд Ц.Нямдорж болон албаны зарим хүмүүс ирж тус газраас зохион байгуулж буй арга хэмжээтэй танилцлаа. Энэ өдөр тус газар иргэдэд баримт бичиг, бүртгэлийн талаар зөвлөгөө өгөхөөс гадна www.burtgel.mn цахим хуудсанд хандаж, регистрийн болон иргэний үнэмлэхийн дугаараа хийж өөрийн мэдээллээ шалгах боломжийг хангаж өгсөн юм. Түүнчлэн архивтай холбоотой асуудлаар үйлчилгээ авахаар ирсэн иргэдэд лавлагааны мэдүүлгийн хуудас тарааж захиалгыг нь хүлээн авах зэрэг үйлчилгээг үзүүлэв. Түүнээс гадна цахим үнэмлэх, эд хөрөнгө, бүртгэлтэй холбоотой лавлагаа, зөвлөгөө авах гэсэн иргэдийн хөл нилээдгүй байлаа.

Улсын бүртгэлийн ерөнхий газар Монгол Улсын Мянганы хөгжлийн зорилтод суурилсан Үндэсний хөгжлийн цогц бодлого, Монгол Улсын Засгийн газрын 2008-2012 оны үйл ажиллагааны хөтөлбөр болон Монгол Улсад бүртгэл, мэдээллийн нэгдсэн тогтолцоог бий болгох үндэсний хөтөлбөрийг хэрэгжүүлэх ажлын хүрээнд Улсын бүртгэлийн хууль, эрх зүйн орчинг боловсронгуй болгох, үйлчилгээний үнэ хураамж, шат дамжлагыг багасгах, бүртгэл, мэдээллийн бааз суурийг бэхжүүлэх чиглэлээр ихээхэн ач холбогдолтой томоохон төсөл хөтөлбөрүүд болон арга хэмжээнүүдийг авч хэрэгжүүлсэнээ ийнхүү Монгол Улсын засгийн газар болон олон нийтэд танилцуулав.