Засгийн газрын хэрэг эрхлэх газрын санаачлагаар Улсын бүртгэлийн ерөнхий газар, Сонгуулийн ерөнхий хороо хамтран өнгөрсөн долоо хоногийн Баасан гаригт аймаг болон сумдын засаг дарга нарт зориулан Монгол Улсын Их Хурлын болон орон нутгийн сонгуулийн бэлтгэл ажил, хууль тогтоомжийг хэрэгжүүлэх ажлын талаар мэдээлэл хийлээ.

Мэдээллийг Засгийн газрын хэрэг эрхлэх газрын дэд дарга Д.Нямжав ахлан явуулсан бөгөөд Сонгуулийн ерөнхий хорооны дарга Н.Лувсанжав “Монгол улсын Их Хурлын сонгуулийн хуулийг хэрэгжүүлэх тухай”, Улсын бүртгэлийн ерөхий газрын дарга Л.Амарсанаа “Иргэний цахим үнэмлэхийг түгээх, тараах зохион байгуулалтын ажлын талаар” тус тус илтгэл тавьж, мэдээлэл хийв. Харин энэхүү мэдээллийн дараа аймаг, сумын засаг дарга нар Засгийн газрын хэрэг эрхлэх газар, Улсын бүртгэлийн ерөнхий газар, Сонгуулийн ерөнхий хорооны удирдлагуудтай Монгол Улсын Их Хурлын болон орон нутгийн сонгуулийн бэлтгэл ажил, хууль тогтоомжийг хэрэгжүүлэх ажлын талаар санал солилцож, хэлэлцүүлэг өрнүүлсэн юм.