Улсын бүртгэлийн ажилтны баярын өдрийг угтаж нийт ажилтан, албан хаагчдын дунд бүртгэлийн нэрэмжит шүлэг, дууны уралдааныг зарлаад байсан билээ.

Тэгвэл энэхүү уралдаанд төв, аймаг, нийслэлээс нийт 20 гаруй бүртгэгч бүтээлээ ирүүлснийг энэ сарын 23-нд буюу “Улсын бүртгэлийн ажилтны өдөр” дүгнэж байр эзлүүлэв. Уралдааны шүлгийн төрөлд Ховд аймгийн Улсын бүртгэлийн хэлтсийн дарга Д.Ширэндэвийн “Төрийн алтан аргамжаа” тэргүүн байр эзэлсэн бол дууны үгийн төрөлд тус газрын бичиг хэргийн ажилтан Н.Найдансүрэнгийн “Гэгээн үйлсийн эзэн бид” бүтээл шалгарч, Хөгжмийн зохиолч, Урлагийн гавъяат зүтгэлтэн /УГЗ/ Д.Цэвээнравдан аялгууг хийж, Төмөр замын дуу бүжгийн чуулгын залуу дуучин Н.Дашдэмбэрэл дуулж олны хүртээл болгоход бэлэн боллоо. Ийнхүү бүртгэлийнхэн «Гэгээн үйлсийн эзэн бид» дууныхаа анхны сонсогч нь болж, баярынхаа өдрөөр шинэхэн дуугаа өлгийдөн авсан юм.

Н.Найдансүрэнгийн үг, Хөгжмийн зохиолч, Урлагийн гавъяат зүтгэлтэн

Д.Цэвээнравдангийн ая “Гэгээн үйлсийн эзэн бид” дууг толилуулж байна.

Үг.Н.Найдансүрэн

Ая.Д.Цэвээнравдан

Залуу дуучин.Н.Дашдэмбэрэл “Гэгээн үйлсийн эзэн бид”

Ахуй төрийнхөө хуулийг дээдлээд

Ард олноо бүртгэлд хамруулаад

Иргэнд ээлтэй нийгмийн төлөө

Эвийн хүчээ нэгтгэж явна

Дахилт: Даяар олныхоо төлөө болохоор

Дандаа ариундаа үйлс минь

Өргөн олноо гэсэн болохоор

Өөдрөг явна даа бүртгэлийнхэн

Өндөр төрийнхөө хуулийг биелүүлээд

Өргөн түмэндээ өмчийг ойртуулаад

Төгөлдөр баян амьдралын төлөө

Төрдөө хүчээ өгч явна

Дахилт:

Мандах төрийнхөө хуулийг сахиад

Монгол түмнийхээ эрхийг хүндлээд

Иргэнд суурилсан бүртгэлтэй болох

Эрхэм зорилго бидэнд байна

Дахилт:

Дээдийн заяат энэ л орондоо

Дэлгэр баян амьдралыг цогцлоох

Бүрэн итгэлтэй олныхоо төлөө

Бүртгэлийнхэн бид хүчээ өгнө

Дахилт: