Улсын бүртгэлийн ерөнхий газар Монголын Мянганы сорилтын сан (ММСС)-гийн Хөрөнгийн эрхийн төсөл хамтран “ЭД ХӨРӨНГИЙН ЭРХИЙН УЛСЫН БҮРТГЭГЧДЭД ЗОРИУЛСАН СУРГАЛТ”-ыг энэ сарын 25-26-ны өдрүүдэд Улаанбаатар хотноо зохион байгуулж явууллаа.

Сургалтын зорилго эд хөрөнгийн бүртгэлийн байгууллагын өнгөрсөн онд авч хэрэгжүүлсэн үйл ажиллагаа, цаашид авч хэрэгжүүлэх арга хэмжээ, эд хөрөнгийн эрхийн бүртгэлийн бүртгэгч нарт төслөөр хийгдэх өөрчлөлт, шинэчлэлд бэлтгэх, ажлын арга барилыг хэрхэн яаж боловсронгуй болгох, мэргэжлийн ур чадварыг дээшлүүлэх, харилцан туршлага солилцоход оршиж байгаа юм.

Энэ үеэр газар, хэлтсийн дарга, мэргэжилтнүүд, холбогдох мэргэжлийн байгууллагын төлөөлөл нийт 20 орчим хүмүүс илтгэл тавьж оролцов. Тухайлбал: Эд хөрөнгийн эрхийн бүртгэлийг хөтлөх болон мэдэгдлийн маягт, мэдэгдэл хүргүүлэх журам /шинэчилсэн найруулга/-ын ерөнхий танилцуулга, эрх зүйн орчин , эд хөрөнгийн эрхийн анхны бүртгэл баталгаажуулалт хийгээд барьцааны эрхийн бүртгэл, түүний загвар, бүртгэлийн технологийн одоо ба ирээдүй, Улсын тэмдэгтийн хураамжийн тухай хууль, үйлчилгээний хураамжийн тухай Эд хөрөнгийн эрхийн бүртгэлийн үйл ажиллагаанд гарч буй зөрчил, анхаарах асуудлууд, төрийн албан хаагчийн ёс зүй, харилцааны соёл, шүүхийн шийдвэр гүйцэтгэх болон эрхийн улсын бүртгэлийн үйл ажиллагааны уялдаа холбоо зэрэг сэдвүүдийн хүрээнд хэд хэдэн томоохон илтгэлүүд тавигдсан юм. Дээрх сургалтад Эд хөрөнгийн эрхийн бүртгэлийн газрын төв, орон нутгийн улсын бүртгэгч нар албаны нийт 40 гаруй хүмүүс оролцлоо. Монголын Мянганы сорилтын сангийн “Хөрөнгийн эрхийн төсөл”-ийн 2 дугаар үе шат тус газарт хэрэгжиж байгаатай холбогдуулан Эд хөрөнгийн эрхийн улсын бүртгэгч нарт зориулсан сургалтыг зохион байгуулж байгаа билээ.