Өнгөрсөн долоо хоногийн Засгийн газрын хуралдаанд тус газрын дарга Л.Мөнхбаатар Монгол Улсын иргэний шинэчилсэн бүртгэлийн талаар болон цаашид эрчимжүүлэхэд анхаарч, зуныхаа амралтаар орон нутагтаа очоогүй, өөр орон нутагт сурч буй оюутан залуус мөн хорих ангид ял эдэлж байгаа хоригдлууд , хугацаат цэргийн албанд алба хашиж буй цэргүүдийг бүртгэх талаар санал, асуулга тавьсан.

Үүний дагуу Засгийн газраас Улсын хэмжээний их, дээд сургуулийн оюутнуудыг хугацаат цэргийн албан хаагчдыг тухайн сургууль, анги дээр нь шинэчилсэн бүртгэлд бүртгэхээр шийдвэрлэсэн. Үүнтэй холбоотойгоор тус газар холбогдох яам, агентлагтай хамтарч ажиллахаар хүсэлтээ хүргүүлээд байна. Орон нутгаас ирж суралцаж байгаа оюутнууд байнга оршин суугаа хаягаараа бүртгэлд хамрагдвал хичээлээсээ чөлөө авах, орон нутагтаа буцах, замын зардал гээд цаг хугацаа, санхүүгийн хувьд оюутнуудыг ихээхэн чирэгдүүлэх болно. Иймээс эхний ээлжинд тус газар БСШУЯ болон бусад их дээд сургуулиудтай хамтран шинэчилсэн бүртгэлд хамрагдаагүй оюутнуудыг сургууль дээр нь бүртгэхээр төлөвлөөд байна. Харин нийслэлд байнга оршин суудаг оюутнуудын хувьд тухайн оршин суугаа газрын хороондоо бүртгүүлнэ. Хөдөө орон нутгийн оюутнуудаас гадна хугацаат цэргийн албан хаагч, хорих ангид ял эдэлж байгаа хүмүүс гэх мэт байнга оршин суух хаягаараа бүртгүүлэх боломжгүй хүмүүсийг Батлан хамгаалах яам, Шүүхийн шийдвэр гүйцэтгэх газар зэрэг холбогдох газруудтай нь хамтран бүртгэнэ. Монгол Улсын иргэний шинэчилсэн бүртгэлд бүртгүүлэх оюутан, сурагчдыг төрсний гэрчилгээ, иргэний үнэмлэхтэй бүртгэнэ. Иймд оюутан сурагчдыг баримт бичгийн зөрчилгүй шинэчилсэн бүртгэлд бүртгүүлэх бэлтгэлээ хангаж байхыг анхааруулж байна.