21 аймгийн 330 сум, нийслэлийн 152 хороо болон хилийн чанад дахь ДТГ-ын бүртгэлийн үйл ажиллагаанд ашиглаж буй тоног төхөөрөмжийг шинэчлэнэ

Бүгд Найрамдах Солонгос Улсын Олон улсын хамтын ажиллагааны байгууллага буюу КОЙКА-гаас “Улсын бүртгэлийн байгууллагын дэд бүтцийг хөгжүүлэх замаар иргэдэд төрийн үйлчилгээг цахим хэлбэрээр хүргэх төсөл”-ийг 2020-2022 онуудад хэрэгжүүлэхээр болсонтой холбогдуулан БНСУ-аас КОЙКА-гийн судалгааны баг Улсын бүртгэлийн байгууллагад ажиллаж байгаа билээ.

Судалгааны баг энэ сарын 07-ноос 10-ны өдрүүдэд Төв аймгийн Зуунмод, Эрдэнэ сум, нийслэлийн БЗД-ийн Улсын бүртгэлийн хэлтэс, 8-р хороо болон нийслэлийн үйлчилгээний нэгдсэн төвийн “Дүнжингарав” дахь салбар болон УБЕГ-ын байранд ажилласан бол хоёр талаас байгууллагдсан ажлын хэсэг өнөөдөр /2019.10.11/ уг төслийг хэрэгжүүлэх судалгааны үр дүнгийн талаар хуралдаж, нэгдсэн ойлголтод хүрэв.

Хуралдааны үеэр талууд энэхүү судалгаа сайн хийгдсэн болохыг нотолж, уг төсөл амжилттай хэрэгжснээр Монгол Улсын 3,2 сая иргэн, 185 мянга гаруй аж ахуйн нэгж үр шимийг нь хүртэнэ гэдэгт санал нэгтэйгээр байр сууриа илэрхийлж байв.

Буцалтгүй тусламжийн хүрээнд Улсын бүртгэлийн байгууллагын ажилтнуудын чадавхыг бэхжүүлэх 10 гаруй сургалтыг БНСУ болон Монгол Улсад зохион байгуулах, серверийн тоног төхөөрөмж нийлүүлэх, мөн 21 аймгийн 330 сум, нийслэлийн 152 хороо болон хилийн чанад дахь Дипломат төлөөлөгчийн газрын бүртгэлийн үйл ажиллагаанд ашиглаж буй тоног төхөөрөмжийг шинэчлэх юм.

Хамтарсан ажлын хэсгийн хуралдаанд БНСУ-ын КОЙКА-г төлөөлж КОЙКА-гийн Монгол Улс дахь Суурин төлөөлөгч Жу Хэйн Нан, КОЙКА-гийн Монгол Улс дахь суурин төлөөлөгчийн газрын орлогч дарга Ким Сү Янгь, КОЙКА-гийн судалгааны багийн ахлагч, ICT хариуцсан мэргэжилтэн Юн Гвон, тоног төхөөрөмж хариуцсан мэргэжилтэн Жи Мён Жүн, гүйцэтгэлийн үнэлгээний мэргэжилтэн Ким Хан Гёль, төслийн менежер Б.Энхсаруул.

Монголын талаас Улсын бүртгэлийн ерөнхий газрын дарга Б.Баасандорж, Хууль зүй, дотоод хэргийн яамны Олон улсын гэрээ, гадаад хамтын ажиллагааны газрын дарга Т.Бат-Өлзий, УБЕГ-ын Санхүү төлөвлөлтийн газрын дарга С.Тэрбиш, Мэдээллийн технологийн газрын дарга Д.Ган-Эрдэнэ, Мэдээллийн технологийн газрын Мэдээллийн сан, программ хангамжийн хэлтсийн дарга П.Нэргүй, тус газрын Мэдээллийн сүлжээ, техник ашиглалтын хэлтсийн дарга С.Чинбат, Мэдээллийн сүлжээ, техник ашиглалтын хэлтсийн ахлах мэргэжилтэн Б.Чойжилсүрэн болон бусад албаны хүмүүс оролцов.

КОЙКА Монголд 2019

Бүгд Найрамдах Солонгос Улсын Олон улсын хамтын ажиллагааны байгууллага буюу КОЙКА нь БНСУ-ын Засгийн газрын буцалтгүй тусламжийн үйл ажиллагааг хэрэгжүүлэгч байгууллага бөгөөд хамтын ажиллагаат улс орны иргэдийн амьдралын чанарыг дээшлүүлэх, олон улсын хамтын ажиллагаанд хувь нэмэр оруулахыг зорилгоо болгон хөгжлийн хамтын ажиллагааны өргөн цар хүрээ бүхий асуудлыг шийдэхийн төлөө олон улсын хэмжээнд хүч боломжоо дайчлан ажиллаж байна.

Зөвхөн 2019 онд Уул уурхайн бохирдлын менежментийн мастер төлөвлөгөө боловсруулах, чадавхыг бэхжүүлэх төсөл; Үндсэн хуулийн цэцийн үйл ажиллагааг цахимжуулах төсөл; ШУТИС МХТС-ийн чадавхыг бэхжүүлэх төсөл; Сүхбаатар аймгийн Баруун-Урт сумын халаалт, хэрэгцээний халуун ус хангамжийн системийг сайжруулах төсөл; ГХЯ-ны Гадаад харилцааны төв архивын чадавхыг бэхжүүлэх төсөл зэрэг нийт найман төсөлд 28 сая гаруй ам.доллар зарцуулахаар байна. Түүнчлэн энэ онд Төр-хувийн хэвшлийн хамтын ажиллагааны хүрээнд есөн төсөл хэрэгжүүлж эхлээд байгаа юм байна.

Монгол Улсын Тогтвортой хөгжлийн үзэл баримтлал 2030 болон Монгол Улсын Засгийн 2016-2020 оны үйл ажиллагааны хөтөлбөрийн хөгжлийн стратегийг тусган боловсруулсан Монгол Улстай хамтран ажиллах хоёр дахь шатны стратегиийн дагуу КОЙКА-гийн Монгол Улс дахь Суурин төлөөлөгчийн газар албан ёсны тусламжийн хөтөлбөрөө хэрэгжүүлэн ажиллаж байна.

Please publish modules in offcanvas position.