Дэлхийн банкны санхүүжилтээр Монгол Улсын Засгийн газраас хэрэгжүүлж байгаа “Ухаалаг Засаг” төслийн хүрээнд  “Монгол Улсад эд хөрөнгийн эрхийн бүртгэлийн цахим систем бүрэн нэвтрүүлэх” дэд бүрэлдэхүүн хэсгийн хэрэгжилтийн явцыг хэлэлцэх уулзалтыг 2018 оны 04 сарын 12-ны өдөр зохион байгууллаа. Уулзалтад Оюуны өмч, улсын бүртгэлийн ерөнхий газрын дэд дарга Д.Дэлгэрсайхан, Дэлхийн Банкны ахлах эдийн засагч, багийн ахлагч Питер Силарски, Санхүүгийн зөвлөх Б.Дөлгөөн, Мэдээлэл, харилцаа холбооны технологийн зөвлөх Г.Энхболор нар оролцов. 

Уулзалтаар төслийн хүрээнд хийж дууссан ажлуудыг дүгнэж, хүрсэн үр дүнгийн талаар хэлэлцлээ. Эд хөрөнгийн эрхийн бүртгэлийн архивын баримтыг цахимжуулах, нэгдсэн цахим системд холбогдоогүй 13 аймгийн бүртгэлийн төвүүдийг нэгдсэн сүлжээнд холбох ажил дуусах шатандаа явж байгаа юм. 

Тус төсөл нь эд хөрөнгийн эрхийн улсын бүртгэлийн архивын баримтыг цахим хэлбэрт бүрэн шилжүүлж, эд хөрөнгийн эрхийн цахим бүртгэлийн (ePRS) програм хангамжийг сайжруулах, Монгол Улсын нийслэл, бүх аймгийг хамарсан Эд хөрөнгийн эрхийн бүртгэлийн нэгдсэн сүлжээ бий болгож, эрхийн бүртгэлийн нэгжүүдийн чадавхийг нэмэгдүүлэх ач холбогдолтой.  

Дэлхийн банкны ажлын хэсэг 2018 оны 04 сарын 13-ны өдөр Сэлэнгэ аймгийн эд хөрөнгийн эрхийн бүртгэлийн цахимжуулалтын үйл ажиллагаатай газар дээр нь  очиж танилцахаар боллоо.