Дэлхийн оюуны өмчийн байгууллагаас 2017 оны 12 дугаар сарын 11, 12-ны өдрүүдэд Сингапурт “Оюуны өмч онцгой мэдээлэл болох нь” сэтгүүлчдийн бүс нутгийн семинарыг зохион байгууллаа. Уг семинарт БНХАУ, БНСУ, Пакистан, Тайланд, Филиппин, Вьетнам, Непал, Энэтхэг, Индонез, Малайз, Иран, Бангладеш, Монгол зэрэг улсаас тус бүр 2 сэтгүүлч оролцов.

Семинар нь сэтгүүлчдийн оюуны өмчийн тухай мэдлэг, ойлголтыг нэмэгдүүлж, оюуны өмчийн талаар илүү үнэн бодит мэдээллийг түгээх зорилготой юм. Семинарын үеэр дэлхийн оюуны өмчийн байгууллагын үүсэл хөгжил, оюуны өмч, зохиогчийн эрх, аж үйлдвэрийн өмчийн эрх, барааны тэмдэг гэж юу болох, оюуны өмчийг хэрхэн хамгаалах, сэтгүүлчдийн бичсэн нийтлэл, мэдээ мэдээллийг оюуны өмчөөр хамгаалж болох эсэх, оюуны өмчийг хамгаалахад тулгарч байгаа саад бэрхшээл, оюуны өмчийг хамгаалахад сэтгүүлчдийн оролцоо ямар байх ёстой зэрэг сонирхолтой сэдвүүдээр салбарын мэргэжилтнүүд илтгэл тавьж, сэтгүүлчдийн дунд хэлэлцүүлэг явууллаа.