Сүүлийн үед цахим орчноор Оюуны өмч, улсын бүртгэлийн ерөнхий газрын дарга Р.Содхүү 2017 оны 12 дугаар сард улсын төсвийн 150 сая төгрөгөөр өөрийн хамаатан болох 17 хүнийг АНУ-руу авч явах гэж байна гэсэн мэдээлэл гарах болсон. Үүнтэй холбогдуулан дараах үнэн бодит тайлбарыг өгч байна.  

Монгол Улсын Их Хурлаар Улсын бүртгэлийн багц хууль хэлэлцэгдэх гэж байгаатай холбогдуулан АНУ-ын Төрийн Департаментаас Иргэний бүртгэл, хилээр зорчих эрх зүйн баримт, хяналт, үл хөдлөх хөрөнгийн бүртгэлийн тогтолцоо зэргийг судлах хүсэлт тавьж, Монгол Улсын бүртгэлийн байгууллагын 12 төрийн албан хаагчийг хүлээн авч, танилцах уулзалт хийхийг хүссэн урилга ирүүлсэн. Үүний дагуу ОӨУБЕГ-ын албан хаагчид 2017 оны 12 дугаар сарын 10-наас 22-ны өдрүүдэд АНУ-д айлчлах гэж байна. Танилцах айлчлалын хүрээнд АНУ-ын тал тус улсад байрлах бүх зардлыг даах бөгөөд албан хаагчид өөрсдөө 2 талын онгоцны тийзний төлбөрийг хариуцаж байгаа юм. 

Байгууллагаас албан хаагчдын онгоцны тийзний төлбөрийг төлөх боломжгүй тул 9 албан хаагч харилцагч Голомт банкнаас тус бүр 2 сая 700 мянган төгрөгийн цалингийн зээл авч, билетийнхээ үнийг хувиасаа гаргасан. Тус газраас Нийслэлийн Засаг дарга бөгөөд Улаанбаатар хотын Захирагч С.Батболдод албан бичиг хүргүүлж, Нийслэлийн улсын бүртгэлийн газрын 2 албан хаагчийн онгоцны тийзний төлбөрийг шийдвэрлүүлсэн.   

Айлчлалын үеэр АНУ-ын иргэний бүртгэлийн хууль тогтоомж, АНУ-ын паспорт олон улсын иргэний агаарын байгууллагын стандартад хэрхэн нийцэж байгаа болон иргэний бичиг баримт олгох үйл ажиллагаа, хуурамч бичиг баримтыг илрүүлэх аргачлал, агентлаг хоорондын мэдээлэл солилцох механизм, бүртгэлийн үйл ажиллагаанд хэрэглэдэг программууд, төрөлт, гэрлэлт болон нас баралтын гэрчилгээ олгох үйл явц, гадаадад оршин суугаа АНУ-ын иргэдийг бүртгэх, бүртгэгчдийн мэргэжлийн ур чадварыг сайжруулах зэрэг үйл ажиллагаатай танилцах юм.