2007-2013 онд манай улсад хэрэгжсэн Монголын Мянганы сорилтын сангийн Хөрөнгийн эрхийн төслийн хүрээнд нийслэлийн 9 дүүрэг болон Завхан, Төв, Хэнтий, Ховд, Өвөрхангай, Орхон, Дархан-Уул, Дорнод аймгийн эд хөрөнгийн архивын цаасан баримтыг цахим хэлбэрт шилжүүлсэн.

 Энэхүү ажлын үргэлжлэл болж, Монгол Улсын Засгийн газар, Дэлхийн банкнаас хэрэгжүүлж байгаа “Ухаалаг  засаг” төслийн “Монгол Улсад эд хөрөнгийн эрхийн бүртгэлийн цахим систем бүрэн нэвтрүүлэх” дэд хэсгийн төслийн хүрээнд Архангай, Баян-Өлгий, Булган, Говь-Алтай, Говьсүмбэр, Дундговь, Дорноговь, Сүхбаатар, Сэлэнгэ, Хөвсгөл, Увс аймгийн эд хөрөнгийн эрхийн бүртгэлийн архивын цаасан баримтыг цахимжуулах ажил эхэллээ.

 Дээрх төслийн хүрээнд 2017 оны 10 дугаар сарын 16-17-ны өдрүүдэд Оюуны өмч, улсын бүртгэлийн ерөнхий газрын Эд хөрөнгийн эрхийн бүртгэлийн газар, Мэдээллийн технологийн газар болон төсөл хэрэгжүүлэгч “Эс Ти Экс Сити Нэт” ХХК хамтран “13 аймгийн эд хөрөнгийн эрхийн бүртгэлийн архивын баримтыг цахимжуулах” төслийн багийн ахлагч нарт зориулсан сургалтыг зохион байгуулав. 

 Архивын баримтыг цахимжуулахдаа 11 аймгийг 3 бүс болгон зохион байгуулж, төслийг хэрэгжүүлэх бөгөөд  уг ажлыг 6 сарын хугацаанд дуусгахаар төлөвлөөд байна.

 “Монгол Улсад эд хөрөнгийн эрхийн бүртгэлийн цахим систем бүрэн нэвтрүүлэх” төсөл хэрэгжиж, эд хөрөнгийн архивын баримтыг бүрэн цахимжуулж, нэгдсэн цахим мэдээллийн сан бий болгосноор манай улсын нийгэм эдийн засгийн хөгжил, хөрөнгийн зах зээлийн хөгжилд ахиц, өөрчлөлт гарч, иргэнд төрийн үйлчилгээг ойртуулах томоохон суурь нөхцөл болох юм.