Ахмадын баярыг тохиолдуулан Оюуны өмч, улсын бүртгэлийн ерөнхий газрын удирдлагууд тус байгууллагад залуу нас, мэдлэг боловсрол, авьяас чадвараа харамгүй зориулж явсан үе үеийн ахмад буурлуудаа хүлээн авч уулзан хүндэтгэл үзүүллээ. 

Энэ үеэр ОӨУБЕГ-ын дарга Р.Содхүү тус салбарт хийж хэрэгжүүлж байгаа ажлын талаар ахмадуудад товч танилцуулж, оюуны өмч, улсын бүртгэлийн байгууллагын үйл ажиллагааг өргөжүүлэн хөгжүүлэхэд ахмадуудын хэлсэн үнэтэй санал, зөвлөгөө чухал болохыг онцолж, эрүүл энх байж, урт удаан наслахыг ерөөгөөд гарын бэлгээ гардууллаа. 

Ахмадуудын зүгээс жил бүр уламжлал болгон хүлээж авч хүндэтгэл үзүүлдэгт талархал илэрхийлж, залуу хойч үеийн залгамж халаа болсон та бүхэнтэйгээ хамт хөгжил дэвшил, сайн сайхны төлөөр хүчин зүтгэхдээ таатай байх болно гэдгээ уламжилсан юм. 

Уулзалтад ОӨУБЕГ-ын Тамгын газрын дарга Б.Бадамцэцэг, Хяналт-шинжилгээ, үнэлгээ, дотоод аудитын газрын дарга Т.Гаттөмөр, Нийслэлийн улсын бүртгэлийн газрын дарга Г.Анхныбаяр, Мэдээлэл сурталчилгааны хэлтсийн дарга Т.Хулан, Хүний нөөц, сургалтын хэлтсийн дарга Т.Ганжаргал, Санхүү, аж ахуйн хэлтсийн дарга Ч.Хүрэлбаатар болон бүртгэлийн салбарт ажиллаж хөдөлмөрлөж явсан азай буурлууд уригдан оролцов.