Үндэсний эрх чөлөөний өдрийг тохиолдуулан Монгол Улсын ерөнхийлөгчийн зарлигаар Оюуны өмч, улсын бүртгэлийн ерөнхий газрын хяналтын улсын байцаагч Л.Батмөнхийг төрийн дээд одон  “Алтангадас”-аар шагналаа.

 Л.Батмөнх нь  1980 онд Санхүү эдийн засгийн техникумд элсэн орж 1982 онд хянан шалгагч нягтлан бодогч мэргэжил эзэмшин төгсөж, 1982-1984 онд Хэнтий аймгийн Ахуй үйлчилгээний комбинатад тооцооны нягтлан бодогчоор ажилласан байна. Мөн 1984 онд МУИС-ийн Эдийн засгийн факультетийн санхүүгийн ангид элсэн орж 1989 онд санхүү эдийн засагч мэргэжлээр, 2004-2007 онд МУИС-ийн Хууль зүйн сургуулийг эрх зүйч мэргэжлээр төгссөн. 

Түүнчлэн 1989-2001 он хүртэл Улаанбаатар хотын Орон сууц нийтийн аж ахуйг удирдах газрын харьяа  ОСНАА-н 4-р конторт нягтлан бодогчоор ажиллаж байгаад 2001 оны 1-р сараас эхлэн Иргэний бүртгэл мэдээллийн улсын төвийн гадаад паспортын хэлтэст гадаад паспортын байцаагчаар томилогдон  2008 оны 6-р сар хүртэл ажиллаж, 2008 оны 6-р сараас эхлэн Хяналт шалгалтын хэлтэст хяналтын улсын байцаагчаар  одоог хүртэл ажиллаж байгаа юм.

Тэрээр Иргэний бүртгэл, мэдээллийн улсын төвийн хөдөлмөрийн аварга 2002, 2004, Шүүхийн шинжилгээний хүндэт өргөмжлөл 2005,  ИБМУТ-ийн хүндэт өргөмжлөл 2006,  УБЕГ-ын хүндэт өргөмжлөл 2008, Бүртгэлийн тэргүүний ажилтан цол, тэмдэг 2009, Хөдөлмөрийн хүндэт медаль 2010,  Хууль зүйн яамны Хүндэт жуух бичиг 2014, УБЕГ-ын Хүндэт жуух бичиг- 2015 онуудад тус тус шагнуулж төрийн албан хаагчийн хүлээсэн үүргээ нэр төртэй биелүүлэн, хамт олноо манлайлан ажиллаж байна.