Засгийн газрын хэрэгжүүлэгч агентлаг Оюуны өмч, улсын бүртгэлийн ерөнхий газрын удирдах  болон нийслэлийн нийт албан хаагчдын нэгдсэн сургалт энэ сарын 1-нээс 04-ны өдрүүдэд Улаанбаатар хотноо боллоо. 

4 өдөр үргэлжилсэн уг сургалтыг тус газрын дарга Р.Содхүү нээж, “Монгол-Улсын Засгийн газрын 2016-2020 оны үйл ажиллагааны хөтөлбөр” түүний хүрээнд оюуны өмч, бүртгэлийн байгууллагаас хэрэгжүүлэх зорилго, зорилт болон цаашдын хөгжлийн чиг хандлагын талаар удирдах албан хаагчдад илтгэл тавьж, үүрэг чиглэл өглөө.

Мөн энэ үеэр байгууллагын нэгдсэн бодлого, түүнийг хэрэгжүүлэх үйл ажиллагаа, иргэн, эд хөрөнгө, хуулийн этгээд, оюуны өмчийн бүртгэлийн үндсэн ойлголт, бүртгэлийн үйл ажиллагаанд мөрдөгдөж буй хууль тогтоомж, эрх зүйн актууд, хяналт-шинжилгээ, үнэлгээ, дотоод аудитын үйл ажиллагаа болон цаашид хэрэгжүүлэх арга хэмжээ, бүртгэлийн системийн өнөөгийн байдал, байгууллагын алба хаагчдын сахилга, ёс зүй цаашид анхаарах асуудлууд зэрэг 20 гаруй сэдвээр холбогдох удирдлага, албан хаагчид илтгэл тавьж, санал солилцлоо.

Энэ удаагийн сургалт нь шинэ бүтэц бүрэлдэхүүнээс гадна Сум, дүүргийн ИТХ-ын сонгуулийн өмнө зохион байгуулагдаж байгаагаараа онцлогтой. Тиймээс уг хуулийг хэрэгжүүлэхэд бүртгэлийн байгууллагын хуулиар хүлээсэн үүрэг, анхаарах асуудлыг сургалтын 2 дахь өдөр бүртгэлийн ажилтнуудад онцгойлон мэдээлэл өгч танилцуулан, чиглэл зааварчилгаа өглөө. 

Сургалтад ОӨУБЕГ-ын удирдлагууд, газар, хэлтсийн дарга нар болон нийслэлийн нийт 350 гаруй албан хаагч оролцов.