Засгийн газрын хэрэгжүүлэгч агентлаг Бүртгэл, статистикийн ерөнхий газар салбарын удирдах ажилтны зөвлөгөөнийг энэ сарын 28, 29-ний өдрүүдэд Улаанбаатар хотноо зохион байгууллаа. Зөвлөгөөнд УБСЕГ-ын удирдлага, газар, хэлтсийн дарга, ахлах мэргэжилтэн болон нийслэл, аймаг, дүүргийн бүртгэл, статистикийн газар, хэлтсийн дарга нар нийт 135 хүн оролцов.

Уулзалт зөвлөгөөнийг УБСЕГ-ын дарга С.Мэндсайхан нээж, бүртгэл, статистикийн үйл ажиллагааны уялдаа, тогтолцоо, шинэчлэл өөрчлөлт болон цаашдын хөгжлийн чиг хандлагын талаар удирдах ажилтнууд илтгэл тавьж, бүртгэл, статистикийн албадын 2015 оны ажлын үр дүнгийн үнэлгээг танилцууллаа. Засгийн газрын шийдвэрийн дагуу үйл ажиллагаагаа нэгтгэн ажиллаж эхэлсэн бүртгэл, статистикийн салбарын удирдах ажилтны тус зөвлөгөөний хаалтын үйл ажиллагаанд Засгийн газрын гишүүн, Хууль зүйн сайд Д.Дорлигжав хүрэлцэн ирж, салбарын хамт олонд ажлын амжилт хүсэж, 2016 онд сонгуулийн жилтэй уялдуулан “нэг иргэн нэг хаяг” уриан дор бүртгэлийн ажлыг сайжруулахыг уриалав.