Бүгд Найрамдах Унгар Улсын Ерөнхий сайдын Монгол Улс дахь айлчлалын хүрээнд дагалдан ирсэн тус улсын бизнес эрхлэгчдийн нэг “Унгарын Мөнгөн тэмдэгт хэвлэлийн хувьцаат компани”-ийн төлөөлөгчид өнөөдөр УБСЕГ-ын удирдлагуудтай уулзаж, хамтран ажиллах гэрээ байгууллаа.

Хамтран ажиллах гэрээ байгуулснаар Монгол Улсын үндэсний гадаад паспортыг олон улсын жишигт нийцүүлж, стандартын шаардлага хангасан, шинэ дэвшилтэт технологийн чиптэй цахим паспорт болгох, түүнийг хэрэглээнд нэвтрүүлэх боломжтой болох юм.

Унгарын мөнгөн тэмдэгт хэвлэлийн хувьцаат компани” нь 1925 онд анх үүсгэн байгуулагдсанаас хойш нууцлалтай бүтээгдэхүүний өөрийн технологи болон туршлагыг үргэлж сайжруулж ирсэн байна. Тус компани нь чиптэй болон чипгүй паспорт, хил нэвтрэх бичиг баримт, аяллын бичиг баримт, Европын холбооны зөвшөөрөлтэй оршин суух хүмүүнлэгийн зөвшөөрлийн бичиг, орогнол хүссэн иргэнд оршин суух зөвшөөрөл, оршин суух картууд, дүрвэгсэд, цагаач болон хамгаалалтад байгаа иргэдэд зориулсан аяллын бичиг баримт зэрэг нууцлал бүхий нэр төрлийн бүтээгдэхүүнийг үйлдвэрлэдэг. Үйл ажиллагааны менежментийн систем нь чанарын /ISO 9001/ хүрээлэн буй орчны хамгаалалтын /ISO 14001/, мэдээллийн аюулгүй байдлын /ISO27001/ зэрэг холбогдох стандартын дагуу явагддаг. Мөн Аюулгүй хэвлэлийн Аюулгүй байдлын өндөр менежментийн системийн гэрчилгээ болох “CWA14641:2009” гэрчилгээг авсан байна.

Монгол Улсад өндөр нууцлал бүхий иргэний цахим паспортыг нийлүүлснээр Монгол Улсын иргэд гадаад орны хилээр түргэн шуурхай, ямар нэгэн хүндрэл чирэгдэлгүй нэвтрэн орох, баримт бичгийн аюулгүй байдлыг хангахад ихээхэн ач холбогдолтой юм.