Хуулийн этгээдийн улсын бүртгэгч нарт зориулсан сургалт болж байна

A- A A+
Хуулийн этгээдийн улсын бүртгэгч нарт зориулсан сургалт болж байна

Улсын бүртгэлийн ерөнхий газар төрийн үйлчилгээг иргэдэд ойртуулж, үйлчилгээний ачаалал, төвлөрөлийг саармагжуулах, хүртээмжийг сайжруулах зорилгоор Хуулийн этгээдийн улсын бүртгэлийн газраас олгодог хуулийн этгээдийн улсын бүртгэлийн талаарх лавлагааг 2020 оны 10 дугаар сарын 08-ны өдрөөс эхлэн Нийслэлийн Баянгол, Баянзүрх, Чингэлтэй, Сонгинохайрхан, Сүхбаатар, Хан-Уул дүүрэг дэх Улсын бүртгэлийн хэлтэс болон Нийслэлийн үйлчилгээний нэгдсэн төв /Дүнжингарав, Мишээл, Драгон/-өөс авах боломжийг бүрдүүлээд байгаа билээ.

Үүнтэй холбогдуулан дээрх дүүргүүдэд томилогдон ажиллаж буй хуулийн этгээдийн улсын бүртгэлийн газрын албан хаагчдад хуулийн этгээдийн улсын бүртгэл хөтлөхөд тулгамдаж буй асуудлын талаар мэдээлэл өгөх зорилго бүхий ээлжилт сургалтыг өнөөдөр /2020.10.10/ Хуулийн этгээдийн улсын бүртгэлийн газраас зохион байгуулж байна.

Сургалтанд “Тамга, тэмдгийн хяналтын дугаар олгоход анхаарах асуудал” сэдвийн хүрээнд Хуулийн этгээдийн улсын бүртгэлийн газрын улсын бүртгэгч Ж.Нямдорж, “Хуулийн этгээдийн улсын бүртгэл хөтлөхөд анхаарах асуудал” сэдвээр улсын ахлах бүртгэгч Б.Лхагвасүрэн, “Хуулийн этгээдийн нэр баталгаажуулахад анхаарах асуудал” сэдвээр улсын бүртгэгч Ч.Батдэлгэр, “Хуулийн этгээдийн хувийн хэрэг, баримт бичгийг архивт шилжүүлэх, лавлагааны талаарх тайланг гаргахад анхаарах асуудал” сэдвээр улсын бүртгэгч Г.Хүчитбаатар, “Хуулийн этгээдийн улсын бүртгэлийн талаарх лавлагаа олгоход анхаарах асуудал” сэдвийн хүрээнд улсын бүртгэгч Б.Алтансүх нар тус тус мэдээлэл хийж байна.

Ташрамд дурдахад, 2020 оны 10 дугаар сарын 08-ны өдрөөс өмнө гаргасан хуулийн этгээдийн улсын бүртгэлийн талаарх лавлагаа авах хүсэлтийн хариуг Хуулийн этгээдийн улсын бүртгэлийн газар буюу “100 айл”-аас авахыг албаны хүмүүс анхааруулж байв.

 

УБЕГ-ын Хамтын ажиллагаа, сургалтын хэлтэс