Татварын ерөнхий хуулийг дагаж мөрдөх журмын тухай хуулийн 9-р зүйлд “Хуулийн этгээдийн улсын бүртгэлийн тухай хуульд өөрчлөлт оруулах тухай хуулийг 2019 оны гуравдугаар сарын 22-ны өдөр баталсантай холбогдуулан 2020 оны нэгдүгээр сарын 1-ний өдрөөс өмнө хуулийн этгээдийн улсын бүртгэлд бүртгүүлсэн этгээд нь тухайн хуулийн этгээдийн эцсийн өмчлөгчийн мэдээллийг 2021 оны нэгдүгээр сарын 1-ний өдөр багтаан хуулийн этгээдийн улсын бүртгэлд бүртгүүлнэ” гэж заасны дагуу хуулийн этгээдийн эцсийн өмчлөгчийн мэдээллийг бүртгэх ажил энэ оны нэгдүгээр сараас үргэлжилж байна.
УБЕГ-ын Хуулийн этгээдийн улсын бүртгэлийн газраас аж ахуйн нэгж эрхлэгчдийн цаг зав болон хуулийн этгээдийн эцсийн өмчлөгчийн мэдээллийг бүртгүүлэх хүрээг нэмэгдүүлэх үүднээс өнөөдөр /2020.08.15/ “Нээлттэй өдөрлөг” зохион байгууллаа.
Өнөөдөр Сангийн яам, Санхүүгийн зохицуулах хорооноос тусгай зөвшөөрөл авдаг хуулийн этгээд болон хуульчийн мэргэжлийн үйл ажиллагаа эрхэлдэг 200 орчим нөхөрлөл, компаниуд хуулийн этгээдийн эцсийн өмчлөгчөө бүртгүүллээ.
Дээрх үйл ажиллагааны зорилго нь хуулийн этгээдээр дамжуулан мөнгө угаах, терроризмыг санхүүжүүлэх, авлига, хээл хахууль, татвараас зайлсхийх гэмт хэрэгт холбогдох эрсдэлээс урьдчилан сэргийлэхэд оршино.
Өмнө нь зөвхөн ашигт малтмалын лицензтэй компаниудын эцсийн өмчлөгчийг бүртгэдэг байсан бол одооноос Хуулийн этгээдийн улсын бүртгэлд бүртгүүлсэн 180 мянга гаруй аж ахуйн нэгж эцсийн өмчлөгчийн талаарх мэдээллээ УБЕГ-аас баталсан журам, маягтын дагуу мэдүүлээд байна.
УБЕГ-ын Хамтын ажиллагаа, сургалтын хэлтэс
