Гадаад паспортын яаралтай захиалга авахгүй

Иргэд гадаад паспортоо яаралтай, энгийн хэмээн хоёр ангиллаар захиалдаг. Тэгвэл гурав хоногийн дотор хэвлэгддэг яаралтай захиалга ирэх сарыг хүртэл нэмж авахгүй байна гэсэн иргэдийн гомдол байна. Энэ талаар Улсын бүртгэлийн ерөнхий газрын Иргэний бүртгэлийн газрын дарга Д.Энхцэцэгээс тодрууллаа.

 

-Гадаад паспортын захиалга авахгүй байна гэх мэдээлэл бий. Энэ талаар тодруулъя?

-Гадаад паспортыг иргэд 10 хоногийн дотор, мөн гурав хоногийн дотор гэсэн ангилалтайгаар захиалдаг. 10 хоногийн дотор гарах энгийн үйлчилгээ маань хэвийн үргэлжилж байна. Өдөрт л гэхэд 500 гаруй хүнд үйлчилж, дугаарынх нь дагуу гадаад паспорт олгож байгаа.

Харин гурав хоногийн дотор яаралтайгаар захиалах үйлчилгээг түр зогсоосон. Түр зогсоосон гэдэг нь иргэдийг олон цагаар оочерлуулахгүйн тулд дугаар олголт хийсэн. Ингээд иргэд есдүгээр сарын 30-ныг хүртэл дугаар авсан гэсэн үг. Энэ сарыг дуустал дугаар авсан иргэдэд гадаад паспортыг нь хэвлэж өгнө. Харин аравдугаар сарын 1-нээс захиалга хэвийн үргэлжилнэ.

-Энэ хугацаанд яаралтай эмчилгээнд явах шаардлагатай ч юм уу гэнэтийн асуудалтай иргэдэд нэмэлт үйлчилгээ үзүүлэх үү?

-Үзүүлнэ. Тухайн иргэн хүсэлт гаргах хэрэгтэй. Зайлшгүй шаардлагатай хүсэлтийг хүлээн авч паспортын захиалга авна. Тухайлбал, яаралтай эмчилгээ, хурал зөвлөгөөн, сургуульд явах иргэдийн хүсэлтийг хүлээж авч байгаа.

-Гадаад паспортын захиалга өнгөрсөн зуны турш их байлаа. Өмнөх жилүүдийг бодвол гадаад явах иргэдийн тоо нэмэгдсэнтэй холбоотой юу?

-Тийм. Өмнө нь нэг жилд 120 мянган иргэний гадаад паспортын захиалгыг бэлддэг байсан. Гэтэл энэ оны зөвхөн эхний долоон сард 122 мянган иргэний захиалга ирсэн. Тиймээс энэ жил гадаад паспортын бэлдэц авах санхүүжилтыг төсөвт нэмэлтээр тодотгол хийлгүүлж шийдэх болсон. Ер нь дараа дараагийн жилүүдэд бэлдэц дууссан асуудал үүсгэхгүйн тулд бэлдэцийн санхүүжилтыг зохих хэмжээнд олгох санал ч гаргасан.

-Одоо бэлдэцийн нөөц хангалттай болсон уу. Хамгийн сүүлд бэлдэцийг хэзээ нийлүүлсэн бэ?

-Хамгийн сүүлд 10-аад хоногийн өмнө нэмэлт бэлдэц нийлүүлсэн.

ХАРИЛЦАХ

Засгийн газрын хэрэгжүүлэгч агентлаг - Оюуны өмч, улсын бүртгэлийн ерөнхий газар 14171 Улаанбаатар хот, Сүхбаатар дүүрэг, Цагдаагийн гудамж
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890, 320502 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

ВЭБ ХОЛБООС

Хайлт