Ц.Батцайз: Ирэх долоо хоногт гадаад паспорт яаралтайгаар гаргаж эхэлнэ

Улсын бүртгэлийн ерөнхий газар гадаад паспорт яаралтай шинээр авах үйлчилгээгээ түр хугацаанд зогсоожээ. Энэ тухай УБЕГ-ын Иргэний бүртгэлийн газрын дарга Ц.Батцайзаас тодрууллаа.

-Гадаад паспорт 10 хоногт багтаж гарахгүй байгааг иргэд шүүмжилж байна. Яагаад хугацаандаа багтаж гарахгүй байгаа вэ?

-Монголчуудын гадагшаа явах урсгал эрс нэмэгдсэн. Тухайлбал өдөрт нэг цонхны үйлчилгээгээр 100 хүнд үйлчилдэг байсан бол өнөөдрийн байдлаар 200-300 хүнд үйлчилж байна. Ийнхүү ачаалал нэмэгдсэнээр хэвлэлтийн горимд өөрчлөлт орж саатах явдал гарч буй юм.  Түүнчлэн гадаад паспортын нөөц багассан. МИАТ-ын зүгээс гадаад паспорт тээвэрлэх ажил удааширснаас хугацаа сунах явдал гарч байна. Гэхдээ бид  аль болох хугацаанд нь гаргахыг хичээж байгаа. Энэ долоо хоногт л хугацаа сунаж байна.

 

-Гадагшаа явах урсгал нэмэгдэж буйн гол шалтгаан нь юу вэ ?

-Аялал жуулчлалын цаг үе эхэлсэнтэй холбогдуулан гадаад паспорт шинээр авах иргэдийн тоо эрс нэмэгдсэн. Энэ үетэй зэрэгцэн сургууль, цэцэрлэгийн амралт эхэлж байгаа учраас хүүхдүүдээ гадагш нь дагуулж явахаар паспорт авч байна. Түүнчлэн ОХУ-тай визгүй зорчих болсноор гадаад паспорт авагсдын тоо 2-3 дахин нэмэгдлээ. Наад зах нь Итгэлт хамба руу мөргөх мөргөлчдийн цуваа нэмэгдчихлээ шүү дээ. Мөн Солонгос руу Хөдөлмөрийн гэрээгээр ажиллах иргэдийн бүртгэл эхэлсэн нь ачаалал үүсгэж байгаагийн нэг шалтгаан болсон.

-Гадаад паспорт яаралтай шинээр авах үйлчилгээгээ зогсоосон гэсэн.  Энэ үйлчилгээг хэвийн горимд нь  хэзээ шилжүүлэх вэ?

- Дээрх ачааллаас болж гадаад паспорт яаралтай гаргах үйлчилгээг энэ сарын 4-нөөс эхлэн түр хугацаанд зогсоогоод байна.Ирэх долоо хоногоос  гадаад паспорт яаралтай шинээр авах үйлчилгээ хэвийн үргэлжилнэ. Гадаад паспорт яаралтайгаар ажлын гурван өдөр, энгийнээр ажлын 10 хоногт багтаан олгодог.

-Засгийн газрын тогтоолоор агентлагуудын албан хаагчдыг цөөлсөн. Танай байгууллагын хувьд хичнээн хүн цомхотгов. Энэ нь ачаалал нэмэгдсэн  үед хэр нөлөөлж байна вэ?

-Манай агентлагын хэмжээнд орон тоог 15 хувиар багасгасан. Мэдээж энэ нь ачаалал ихсэж буй үед тодорхой хэмжээгээр нөлөөлж байна. Гэхдээ бид байгаа  бүх хүчээ дайчлан ажиллаж байгаа. Амралтын өдрүүд болон оройны 20 цаг хүртэл уртасгасан цагаар ажлаа нугалдаг.

-Өнгөрсөн онд шинээр хичнээн гадаад паспорт олгосон бэ. Эхний улирлын тоон мэдээ гарсан уу?

-2014 онд 130 мянга гаруй иргэн гадаад паспорт шинээр авсан. Эхний таван сарын байдлаар 80 мянга гаруй паспорт шинээр олгоод байна. Энэ үзүүлэлт нь шинээр паспорт авагсад  өмнөх жилээс эрс нэмэгдэж буйг илтгэнэ. Харин  60 гаруй мянган иргэн өнгөрсөн онд  паспортоо  сунгуулсан. Он гарсаар энэ хэмжээний паспортыг  сунгалаа. Өөрөөр хэлбэл бид бүтэн жил олгодог байсан паспортыг 6 сард олгож байна.

-Аялал жуулчлалын улиралд ачаалал эрс нэмэгддэг гэлээ. Энэ улирлаас өмнө паспорт авах талаар олон нийтэд анхааруулсан уу?

-Бид байгууллагынхаа вэб сайт болон хэвлэл мэдээллийн хэрэгслээр  аялал жуулчлалын улирал буюу тавдугаар сард ачаалал эрс нэмэгддэг учир  шинэ паспортыг урьдчилан авахыг удаа дараа анхааруулж байсан. Гэтэл иргэд цагийг нь тулгаж ирдэг хэвээр байна. Тухайлбал иргэд маргааш визанд орох гэсэн юм, ОХУ руу явах гээд яаралтай паспорт гаргах хүсэлт их тавьдаг. Тиймээс  аль болох хугацаанаасаа өмнө биднээр үйлчлүүлэхийг хүсч байна.

- Манай улс АСЕМ-ийн дээд хэмжээний уулзалтыг ирэх онд зохион байгуулна. Үүнтэй холбоотой танай газраас  технологийн шинэчлэл  хийж байгаа гэж сонслоо. Энэ тухайд?

-АСЕМ-ийн уулзалтыг угтан Монгол Улс чиптэй цахим гадаад паспорт нэвтрүүлэхээр ажиллаж байна. Энэ хүрээнд бэлтгэл ажлуудыг базааж байгаа. Хүмүүс чиптэй  цахим паспорт нэвтрүүлнэ гэхээр хуучнаа яах вэ гэж их асуудаг. Тэгэхээр аль, альнийг нь хэрэглэнэ гэдгийг хэлье.

Б.Заяа

ХАРИЛЦАХ

Засгийн газрын хэрэгжүүлэгч агентлаг - Оюуны өмч, улсын бүртгэлийн ерөнхий газар 14171 Улаанбаатар хот, Сүхбаатар дүүрэг, Цагдаагийн гудамж
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
Факс : 976-11-320083
И-мэйл хаяг : contact@burtgel.gov.mn
Вэб сайт : http://burtgel.gov.mn

ВЭБ ХОЛБООС

Хайлт