Улсын бүртгэлд мэдээлэл технологийг нэвтрүүлсэн нь

1990 оноос эхлэн электрон тооцоолон бодох машины туузан хальсанд хадгалагдаж байсан ХААТР-ын мэдээллийн санг компьютерийн мэдээллийн сан руу DOS –ийн системийн орчинд хөрвүүлэх ажлыг хийж гүйцэтгэсэн. Энэ ажлыг хийж гүйцэтгэхэд дэд дарга А.Гэрэл, мэргэжилтэн Ц.Цэдэв, ахлах мэргэжилтэн Х.Энхжаргал, ахлах програм зохиогч Д. Хандсүрэн нар идэвх зүтгэл, сэтгэл гарган ажиллаж, орчин үеийн иргэний бүртгэлийн цахим мэдээллийн сангийн үндэс суурийг үүсгэн байгуулсан юм.
PC 286, 386, 496 компьютер ашиглан хүн амын автоматжуулсан төв регистрийн мэдээллийн санд нийслэлийн дүүрэг болон аймаг, орон нутагт бүртгэсэн ХААТР маягтыг Иргэний бүртгэл, мэдээллийн улсын төвд ирүүлж, мэдээллийн санд шивж оруулах ажлыг операторууд хийж байжээ. Иргэний бүртгэл, мэдээллийн улсын төв нь 1993 онд 240 мв.хард дисктэй PC 486, 170 мв. хард дисктэй PC 386 компьютер болон сүлжээний тоног төхөөрөмжийг худалдан авч 500 mb багтаамжтай хатуу диск бүхий сервер компьютертэй NOVEL3.1 сүлжээг үүсгэн байгуулж, холбогдох програм хангамжийг боловсруулан, мэдээллийн цахим сан байгуулан овог, нэр, регистрийн дугаараар нь хувь хүний холбогдолтой лавлагааг компьютерээс гарган авч иргэдэд байнга үйлчилж эхэлсэн байна.
Сүлжээнд 5 терминал компьютер холбон хөдөө орон нутгаас ирүүлсэн ХААТР-1-ээс ХААТР-18 маягтын мэдээллийг оператор шивж оруулан мэдээллийн цахим санг нэмж, баяжуулах зэргээр ажиллаж, хүн амын автоматжуулсан төв регитсрийн эхний ээлжийг ашиглалтад өгч, Монгол Улсын хүн амын цахим мэдээллийн санг үүсгэн байгуулснаа 1993 оны 7 дугаар сарын 11-ны өдөр орон даяар зарласан. Ингэснээр Монгол Улсад хүн амаа бүртгэх, статистик судалгаа гаргах нэгдсэн систем бий болох үндэс тавигджээ. Тухайн үед Иргэний бүртгэл, мэдээллийн улсын төвийн нэг, хоёр, гурав дугаар хэлтсийг NOVEL сүлжээгээр холбон үйл ажиллагаагаа явуулж байсан нь тухайн үедээ Иргэний бүртгэл, мэдээллийн улсын төв төдийгүй Монгол Улсын хэмжээнд компьютерийн анхны сүлжээ болсон юм.
NOVEL сүлжээг үүсгэн байгуулахад Иргэний бүртгэл, мэдээллийн улсын төвийн орлогч дарга бөгөөд I хэлтсийн дарга А.Гэрэл, ахлах мэргэжилтэн Х.Энхжаргал, ахлах програм зохиогч Д.Хандсүрэн, инженер Т.Алагсай нар ажиллаж байжээ.

ХАРИЛЦАХ

Засгийн газрын хэрэгжүүлэгч агентлаг - Оюуны өмч, улсын бүртгэлийн ерөнхий газар 14171 Улаанбаатар хот, Сүхбаатар дүүрэг, Цагдаагийн гудамж
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
Факс : 976-11-320083
И-мэйл хаяг : contact@burtgel.gov.mn
Вэб сайт : http://burtgel.gov.mn

ВЭБ ХОЛБООС

Хайлт