Монгол улсын иргэний шинэчилсэн бүртгэлийн нээлт болов

Монгол Улсын Иргэний шинэчилсэн бүртгэлийг бүртгэх нээлтийн ажиллагаа Төрийн ордонд өнөөдөр амжилттай боллоо. Нээлтэнд Монгол Улсын Ерөнхий сайд С.Батболд, Монгол Улсын Тэргүүн шадар сайд Н.Алтанхуяг, Улсын бүртгэлийн Ерөнхий газрын дарга Л.Мөнхбаатар болон албаны бусад зочид, төлөөгчид оролцлоо.

Энэ үеэр Иргэний шинэчилсэн бүртгэлийг бүртгэх иргэний анхны төлөөлөл болгож, Монгол Улсын Ерөнхий сайд С.Батболд, Монгол Улсын Тэргүүн шадар сайд Н.Алтанхуяг нар шинэчилсэн бүртгэлд хамрагдав. Мөн Улсын бүртгэлийн Ерөнхий газрын дарга Л.Мөнхбаатар Монгол Улсын Иргэний шинэчилсэн бүртгэлийг бүртгэх орчин үеийн техник, тоног төхөөрөмж болон бүртгэлд бүртгэх арга ажиллагааны талаар танилцуулсан юм. Монгол Улсын иргэний бүртгэлийн давхардал, зөрчлийг арилгах зорилгоор Улсын Их Хурлаас иргэний шинэчилсэн бүртгэлийг явуулах, үүнтэй холбогдуулан иргэний ухаалаг үнэмлэх олгох суурь дэд бүтэц, иргэний биеийн өгөгдөлд суурилсан мэдээллийн нэгдсэн сан бий болгохыг Засгийн газарт даалгасан билээ. Үүнтэй холбоотойгоор Улсын бүртгэлийн Ерөнхий газар Монгол Улсын иргэний шинэчилсэн бүртгэлийн бэлтгэл ажлыг улсын хэмжээнд үе шаттайгаар хийж, бэлтгэл ажлуудыг бүрэн хангасан байна. Үүний үр дүнд Улсын Их Хурал, Засгийн газраас өгсөн үүрэг, чиглэлийн дагуу Засгийн газрын хэрэгжүүлэгч агентлаг Улсын бүртгэлийн ерөнхий газар Монгол Улсад анх удаа иргэдээ биеийн давхцахгүй өгөгдлийн мэдээлэл дээр суурилсан иргэний шинэчилсэн бүртгэлд хамруулах чухал ач холбогдолтой, өргөн хүрээний ажлыг орон даяар ийнхүү амжилттай эхлүүллээ. Монгол Улсын иргэний шинэчилсэн бүртгэлийг орон даяар эхлүүлснээр Монгол Улсын иргэн “Хүний хөгжил сан”-аас хишиг, хувь хүртэх, нийт иргэний төрсний, иргэний үнэмлэхийн болон байнга оршин суугаа газрын бүртгэлийг баталгаажуулж, иргэний биеийн давхцахгүй өгөгдлийн мэдээллийн нэгдсэн сантай болох үр дүн гарч, улмаар иргэдэд мэдээ мэдээлэл, лавлагааг чирэгдүүлэхгүйгээр олгох, цаг завыг нь хэмнэх олон давуу талтайгаас гадна төрийн байгууллагууд ч хоорондоо мэдээллээ чөлөөтэй солилцох шуурхай нөхцлийг бүрдүүлэх, бүртгэлийн мэдээллийн сан үүсгэх, .иргэний бүртгэлийн давхардал арилах, цаашид бүртгэлийг төгөлдөршихөд чухал алхам болж байгаагаараа ихээхэн ач холбогдолтой. Шинэчилсэн бүртгэлийг орчин үеийн дэвшилтэд техник технологийг ашиглан сум, хороодод хийж, иргэдийг хамруулснаар цаашид иргэний шинэчилсэн бүртгэлийн мэдээллийн санг бий болгох, улмаар хувь, хишиг хүртээх, нийгмийн халамж , бүхий л төрийн үйлчилгээг шуурхай бодитойгоор хүргэх үндэс суурийг тавих юм.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт