Зах зээлийг хянан зохицуулах ерөнхий газрын Дэд сайд Тан Жун тэргүүтэй төлөөлөгчдийг хүлээн авч уулзлаа

Улсын бүртгэлийн ерөнхий газрын дарга Б.Баасандорж өнөөдөр /2019.10.17/ БНХАУ-ын Зах зээлийг хянан зохицуулах ерөнхий газрын Дэд сайд Тан Жун тэргүүтэй төлөөлөгчдийг хүлээн авч уулзав.

Уулзалтын эхэнд УБЕГ-ын дарга Б.Баасандорж ноён Тан Жунтай танилцаж буйд баяртай байна гээд БНХАУ болон Монгол Улс хооронд дипломат харилцаа тогтоосны 70 жилийн ой 2019 онд тохиож буйг дурдан хоёр улс энэхүү ойн хүрээнд олон арга хэмжээ зохион байгуулж байгааг тэмдэглэв. Тэрбээр, БНХАУ-ын Зах зээлийг хянан зохицуулах ерөнхий газар болон Монгол Улсын Улсын бүртгэлийн ерөнхий газар гэсэн хоёр байгууллага нь Засгийн газрынхаа хэрэгжүүлэгч байгууллага төдийгүй хуулийн этгээдийн бүртгэлийн үйл ажиллагаанд хяналт тавьж ажилладаг гэдгээрээ ижил үүрэг, функцтэй байгууллагууд юм. Иймд УБЕГ нь БНХАУ-ын Зах зээлийг хянан зохицуулах ерөнхий газартай харилцан туршлага судлах хүрээнд тус байгууллага тоног төхөөрөмжийн аюулгүй байдлын тусгай хяналтыг хэрхэн хийдэг талаар хамтын ажиллагаагаа өргөжүүлэх сонирхолтой буйгаа илэрхийлэв.

БНХАУ-ын Зах зээлийг хянан зохицуулах ерөнхий газрын Дэд сайд Тан Жун УБЕГ-ын даргыг улсын бүртгэлийн байгууллагынхаа талаар танилцуулсанд талархал илэрхийлж, өнөөдрийн уулзалт хоёр байгууллага хоорондын цаашдын хамтын ажиллагаа өргөжихөд ихээхэн ач холбогдолтой болохыг тэмдэглэв. Тэрбээр, өөрийн байгууллагын талаар танилцуулахын сацуу Засгийн газрын хэрэгжүүлэгч агентлаг Улсын бүртгэлийн ерөнхий газрын сайн туршлагыг судлах сонирхолтой байна. Түүнчлэн энэхүү хамтын ажиллагааг бэхжүүлэх хүрээнд хоёр байгууллага хооронд Санамж бичиг байгуулах хүсэлтэй байгаагаа хэлж байв.

УБЕГ-ын дарга Б.Баасандорж хэлэхдээ, дэлхийн мэдээллийн технологи хурдацтайгаар хөгжиж буй эдүгээ цагт Улсын бүртгэлийн байгууллага нь мэдээллийн технологид суурилсан туршлагыг Америк, Европ гэхээс илүү хөрш орнуудынхаа тэр тусмаа БНХАУ-ын Зах зээлийг хянан зохицуулах ерөнхий газрын туршлагыг судлах сонирхолтой байна. Хамтын ажиллагаагаа өргөжүүлэх хүрээнд хоёр байгууллага хооронд Санамж бичиг байгуулах асуудал дээд түвшний байгууллага буюу Хууль зүй, дотоод хэргийн сайдад танилцуулсны дараа шийдвэрлэгдэнэ гэдэг илтгэлтэй байна гэв.

БНХАУ-ын Зах зээлийг хянан зохицуулах ерөнхий газрын тухай

БНХАУ-ын Зах зээлийг хянан зохицуулах ерөнхий газар нь зах зээлийн хяналт, холбогдох хууль, журмыг сахиулах ажлыг хариуцдаг эрх бүхий байгуулага юм.

Зах зээлийг хянан зохицуулах ерөнхий газар нь Байгууллагын Шинэчлэлийн Хөтөлбөрийн хүрээнд 2018 оны 04 дүгээр сард БНХАУ-ын Төрийн зөвлөлийн дэргэдэх яамны статустайгаар байгуулагдсан. Тус газар Намын Төв Хорооноос гаргаж буй зэх зээлтэй холбогдох хууль, бодлого, шийдвэрүүдийн хэрэгжилтийг хангадаг бөгөөд зах зээлийн төлөвлөрөлийг зохицуулах, чадавхижуулах арга хэмжээ авч ажилладаг байгууллага юм.

Тус газрын чиг үүрэгт: зах зээлийн нэгдсэн зохицуулалт, аж ахуйн нэгж байгууллагын бүртгэл, зах зээл дэх зохицуулалтын цогц хуулийг хэрэгжүүлэх ажлыг зохион байгуулж, зааварчилгаа өгөх, монополийн эсрэг хууль сахиулах, макро түвшний менежмент, бүтээгдэхүүний чанар, аюулгүй байдлын зохицуулалтад хяналт тавих, тоног төхөөрөмжийн аюулгүй байдлын тусгай хяналт, хүнсний аюулгүй байдлын зохицуулалт, хэмжилзүйн удирдлага, стандартчиллын нэгдсэн удирдлага, хяналт шалгалт, үндэсний баталгаажуулалт, итгэмжлэлийн нэгдсэн зохицуулалт, зах зээлийн зохицуулалттай холбоотой мэдээ, мэдээлэл, мөн олон улсын хамтын ажиллагаа хамаарна.

Аж үйлдвэр, худалдааны еренхий газар, Чанарын хяналт, хорио цээрийн хяналтын алба болон Хоол хүнс, Мансууруулах бодисын чиг үүргийг нэгтгэж байгуулагдсан Зах зээлийг хянан зохицуулах ерөнхий газарт БНХАУ-ын Үндэсний эм зүйн бүтээгдэхүүн худалдааны газар болон Үндэсний оюуны өмчийн газар харьяалагддаг байна.

БНХАУ-ын Зах зээлийг хянан зохицуулах ерөнхий газрын Удирдах зөвлөл нь Сайд, 7 Дэд сайд, Ерөнхий байцаагч, Ерөнхий инженер, Хүнсний аюулгүй байдлын Ерөнхий захирлаас бүрддэг ба 27 газар, хэлтэстэй.

Зах зээлийг хянан зохицуулах ерөнхий газрын Дэд сайд Тан Жун нь хуулийн этгээдийн улсын бүртгэлийг хариуцдаг аж.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт