e-barimt аппликейшн ашиглан бүртгэлийн үйлчилгээний төлбөр төлөх талаар сургалт зохион байгууллаа

Улсын бүртгэлийн ерөнхий хуульд /2018.11.01-ний өдрөөс хүчин төгөлдөр болсон/ төрийн үйлчилгээг түргэн шуурхай авах нөхцөлийг бүрдүүлэх, улсын бүртгэлийн үйл ажиллагааны зарчим, төрөл, мэдээллийн нэгдсэн санг бүрдүүлнэ гэж заасны дагуу Улсын бүртгэлийн байгууллагаас тус хуулийн хэрэгжилтийг хангах ажлын хүрээнд дараах ажлуудыг хэрэгжүүлж байна.

Үүнд, Улсын бүртгэлийн байгууллагаас үзүүлж буй үйлчилгээнүүдээс анх удаа и-баримт олгодог болох ба энэхүү шийдэл нь Монгол Улсын нутаг дэвсгэрт энэ оны аравдугаар сараас хэрэгжиж эхлэнэ. Тодруулбал, иргэн энгийн гадаад паспорт анх удаа авахад 32,500 төгрөг төлж, и-баримт авна гэсэн үг юм. Энэ нь НӨАТ-ын урамшуулал бус зөвхөн сугалаанд оролцох эрх бөгөөд энэхүү шийдэл нь төрийн байгууллагуудаас үзүүлж буй анхдагч үйлчилгээ юм.

Мөн, одоо ашиглаж буй e-barimt аппликейшнийг өргөтгөж, дээрх 32,500 төгрөгийг нэг удаагийн гүйлгээгээр төлбөр төлдөг болно. Тодруулбал, паспорт авахад - улсын тэмдэгтийн хураамж /5,000₮/, үйлчилгээний хөлс /12,500₮/, бичилтийн үнэ /15,000₮/ гэсэн гурван төлбөрийн баримт бүрдүүлдэг бол одоо нэг гүйлгээ хийн 300₮-ийн шимтгэл төлдөг болно. Өөрөөр хэлбэл эдгээр гурван гүйлгээ хийхэд банкуудаас шалтгаалан дор хаяж 1,200 төгрөг болон цаг хугацааны хэмнэлт гарах юм. Төлбөр нь системд бүртгэгдэж, паспортоо захиалахад илүү түргэн шуурхай болно.

Түүнчлэн, e-barimt буюу НӨАТ-ын урамшууллын систем дэх буцаан олголтын урамшууллын мөнгөн дүнгээс улсын бүртгэлийн байгууллагаас үзүүлж буй үйлчилгээний төлбөрийг хийж болдог болно. Тодруулбал, хуримтлагдсан урамшууллын мөнгөн дүнгээс гадаад паспортын 32,500₮-ийг суутгаж болно гэсэн үг юм. Гааль, татвар, санхүүгийн мэдээллийн технологийн төвөөс үзүүлэх уг үйлчилгээ ирэх оноос хэрэгжиж эхлэнэ.

Ийнхүү эдгээр ажлуудын бэлтгэлийг хангах хүрээнд УБЕГ-ын Иргэний улсын бүртгэлийн газраас “ebarimt аппликейшн ашиглан бүртгэлийн үйлчилгээний төлбөр төлөх талаар нийслэлийн улсын бүртгэлийн бүртгэгч нарт зориулсан сургалт”-ыг 2019 оны 10 дугаар сарын 09-нөөс 11-ний өдрүүдэд зохион байгууллаа.

Энэхүү сургалтын зорилго нь төрийн үйлчилгээний төлбөр тооцоог цахим хэлбэрт шилжүүлэх, төрийн бүх үйлчилгээг нэгдсэн QR-ын стандартад шилжүүлэх, нэхэмжлэх суурьтай үйлчилгээний төлбөрийг цахимаар төлөх үйлчилгээ үзүүлэхэд оршив.

Тус сургалтанд нийслэлийн үйлчилгээний нэгдсэн төв, дүүргүүдийн иргэний улсын бүртгэл хариуцсан 200 гаруй улсын бүртгэгч нар хамрагдаж, нэмэгдсэн өртгийн албан татварын системд суурилсан мобайл аппликейшн ашиглан хэрхэн төрийн үйлчилгээ авах, онлайн төлбөр тооцоо хийх талаар мэдээлэл сонсов.

Сургалтад Гааль, татвар, санхүүгийн мэдээллийн технологийн төв УҮГ-ын дарга Т.Батбилэг, систем төлөвлөлтийн албаны менежер Д.Очирпүрэв, систем шинжээч Г.Тэмүүжин, УБЕГ-ын Улсын бүртгэлийн нэгдсэн архивын ахлах мэргэжилтэн Т.Байгалмаа, мэргэжилтэн Н.Наранчимэг, мэргэжилтэн Б.Лхагвасүрэн, Мэдээллийн технологийн газрын мэдээллийн сан, програм хангамжийн хэлтсийн програмист Ч.Дэлгэрбаяр нар мэдээлэл хийж, дадлага ажил хийснээр улсын бүртгэгч нарт их ач холбогдолтой сургалт боллоо.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт