Улсын бүртгэлийн байгууллагын ахмадууддаа хүндэтгэл үзүүлэв

Олон улсын болон Монголын ахмадын өдрийг тохиолдуулан Улсын бүртгэлийн ерөнхий газрын удирдах албан тушаалтнууд тус байгууллагад олон жил үр бүтээлтэй хөдөлмөрлөж, гавьяаныхаа амралтад гарсан ахмад ажилтнуудаа хүлээн авч уулзан, хүндэтгэл үзүүллээ.

Жил бүрийн 10 дугаар сарын 1-нийг “Олон улсын ахмадын өдөр” болгохоор НҮБ-ын Ерөнхий ассамблей 1990 онд, “Монголын ахмадын өдөр” хэмээн тэмдэглэхээр Монгол Улсын Засгийн газар 1992 онд зарлаж байсан билээ.

Улсын бүртгэлийн ерөнхий газрын Ахмадын хороонд өнөөдөр 188 ахмад харьяалагдаж байгаагаас, нийслэлд 93, орон нутагт 95 ахмад настан байна.

Хүндэтгэлийн арга хэмжээний эхэнд Улсын бүртгэлийн ерөнхий газрын дарга Б.Баасандорж ахмадууддаа хандан чин сэтгэлийн мэндчилгээ дэвшүүлж, энх тунх амьдарч, урт удаан наслахыг хүсэн ерөөхийн сацуу уламжлалт уулзалтад хүрэлцэн ирсэнд талархал илэрхийлэв.

Тэрбээр хэлсэн үгэндээ, “Улсын бүртгэлийн байгууллагын үйл ажиллагааг тогтвортой явуулах, төрийн албаны нэр хүнд, ёс зүй, хэм хэмжээг чанд баримтлах үлгэр дуурайлыг Та бүхэн үзүүлж ирсэн эрхэм хүмүүс. Гавьяаныхаа амралтаа авсан зарим ахмадууд маань гэртээ суухаас илүү хөдөлмөр эрхлэж, байнгын нийгмийн харилцаанд байх сонирхолтой байдаг. Иймд ахмадуудынхаа нийгмийн асуудлыг шийдэхэд дэмжлэг үзүүлэх хүрээнд “Гэрэгэ системс” ХХК-тай хамтран, саналаа ирүүлсэн ахмадуудыг “Киоск” машины зааварлагчын ажлын байраар хангаад байна. Түүнчлэн ирэх 10 дугаар сараас эхлэн Монгол Улсын энгийн гадаад паспорт захиалах, улсын бүртгэлийн байгууллагын лавлагаа авахад е-баримт олгодог болно. Энэ нь НӨАТ-ын урамшуулал бус зөвхөн сугалаанд оролцох эрх юм. Энэхүү шийдэл нь төрийн байгууллагуудаас үзүүлж буй анхдагч үйлчилгээ юм” гэв.

Уулзалтад оролцсон ахмадууд үг хэлж, төрийн үйл хэрэгт хүчин зүтгэж ирсэн үе үеийн ахмад буурлуудад байнга анхаарал, халамж тавьдаг Улсын бүртгэлийн байгууллагад талархал илэрхийлээд цаашдын ажил үйлсэд нь өндөр амжилт хүслээ.

Хүндэтгэлийн уулзалтад УБЕГ-ын дэд дарга Д.Дэлгэрсайхан, Тамгын газрын дарга Г.Цолмон, Захиргаа, хүний нөөцийн хэлтсийн дарга Г.Мөнхцэцэг, Эрх зүй, гадаад харилцааны хэлтсийн дарга Н.Цогтсайхан, Санхүү, төлөвлөлтийн газрын дарга С.Тэрбиш, Иргэний улсын бүртгэлийн газрын дарга Т.Нармандах, Хуулийн этгээдийн улсын бүртгэлийн газрын дарга Ж.Аюуш, Эд хөрөнгийн эрхийн улсын бүртгэлийн газрын дарга Б.Ариунболд, Хяналт шалгалтын газрын даргын албан үүргийг түр орлон гүйцэтгэгч Б.Ганзориг, Хяналт шинжилгээ, үнэлгээ, дотоод аудитын газрын дарга Г.Цэцгээ, Мэдээллийн технологийн газрын дарга Д.Ган-Эрдэнэ болон албаны бусад хүмүүс оролцсон юм.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт