Улсын бүртгэлийн байгууллагын албан хаагчдад зориулсан “Иргэн төвтэй төрийн үйлчилгээ” баруун бүсийн нэгдсэн сургалт өнөөдөр /2019.09.05/ Ховд аймгийн төвд эхэллээ.
Сургалтад Баян-Өлгий, Говь-Алтай, Увс, Ховд аймгийн улсын бүртгэлийн хэлтсийн 120 гаруй албан хаагчид хамрагдаж, 2019 оны 09 дүгээр сарын 05, 06-ны өдрүүдэд үргэлжлэх юм. Уг сургалт улсын бүртгэлийн багц хуулийн хэрэгжилтийг хангах, улсын бүртгэлийн байгууллагын албан хаагчдын хууль эрх зүйн болон ёс зүйн мэдлэгийг дээшлүүлэхтэй холбогдуулан чиглэл өгөхөд оршиж байгаа юм.
Сургалтыг Улсын бүртгэлийн ерөнхий газрын дарга Б.Баасандорж нээж хэлсэн үгэндээ, Улсын бүртгэлийн ерөнхий хууль шинэчлэн батлагдсанаас хойш жил гаруй хугацаа өнгөрч, энэ хугацаанд улсын бүртгэлийн байгууллага цөөнгүй ажил хийсэн. Шинэчилсэн багц хуулийн тэргүүн зорилтод төрийн үйлчилгээг түргэн шуурхай авах нөхцөлийг бүрдүүлэх гэж заасан байдаг. Энэхүү зорилтын хэрэгжилтийг хангахын тулд бид юуны өмнө хууль эрх зүйн болон ёс зүйн мэдлэгээ дээшлүүлж, иргэдэд чиглэсэн үйлчилгээгээ сайжруулах үүрэгтэй хэмээн онцолж байв. Тэрбээр, хоёр өдрийн сургалтад урилгаар оролцож буй эрдэмтэн багш нарын лекц болон удирдах албан тушаалтнуудын хүргэх илтгэлийг зүгээр сонсох бус өөрийн болгож авахад анхаарал хандуулахыг хүсэв.
Өнөөдрийн сургалтын эхэнд хууль зүйн ухааны доктор Б.Гүнбилэг “Үндсэн хуулийн үзэл санаа” сэдвийн дор хичээл заав. Тэрбээр, Монгол Улсын Үндсэн хуулийн тэргүүн хэсэгт заасан дараах заалтуудыг нэг бүрчлэн тайлбарлаж, сургалтад оролцож буй албан хаагчдад илүү ойлгомжтой байх үүднээс төрийн байгууллага, хувь хүн, нийгмийн бүлэг, хүн амын үйл ажиллагаа зэрэг бодит байдалтай харьцуулсан тайлбар хийв. Монгол Улсын Үндсэн хуульд:
Монголын ард түмэн бид:
-улсынхаа тусгаар тогтнол, бүрэн эрхт байдлыг бататган бэхжүүлж,
-хүний эрх, эрх чөлөө, шударга ёс, үндэснийхээ эв нэгдлийг эрхэмлэн дээдэлж,
-төрт ёс, түүх, соёлынхоо уламжлалыг нандигнан өвлөж,
-хүн төрөлхтөний соёл иргэншлийн ололтыг хүндэтгэн үзэж,
-эх орондоо хүмүүнлэг, иргэний ардчилсан нийгэм цогцлуулан хөгжүүлэхийг эрхэм зорилго болгоно. Үүний учир Монгол Улсын Үндсэн хуулийг даяар олноо зарлан тунхаглаж байна хэмээн заасан байдаг.
Үргэлжлүүлэн “Иргэн төвтэй төрийн үйлчилгээ” сэдвийн дор Удирдлагын академийн Төрийн удирдлагын тэнхимийн багш, доктор М.Амартүвшин, “Төрийн албан хаагчийн ёс зүй, байгууллагын үйлчилгээний стандарт” сэдвээр УБЕГ-ын Захиргаа, хүний нөөцийн хэлтсийн дарга Г.Мөнхцэцэг, “Улсын байгууллагын хяналт-шинжилгээ, үнэлгээний аргачлал, байгууллагын үйл ажиллагааг төлөвлөх тайлагнахад анхаарах асуудал” - УБЕГ-ын Хяналт шинжилгээ, үнэлгээ, дотоод аудитын газрын дарга Г.Цэцгээ, “Бүртгэлийн системүүд, тэдгээрийн нэмэлт өөрчлөлт, Улсын бүртгэлийн байгууллагаас үзүүлэх цахим үйлчилгээ” - УБЕГ-ын Мэдээллийн технологийн газрын дарга Д.Ган-Эрдэнэ нар тус тус илтгэл тавьж, хийсэн мэдээлэлтэй холбогдуулан сургалтад оролцогчдын асуултад хариулт өгөв.
Энэхүү сургалт Улсын бүртгэлийн ерөнхий газраас Азийн хөгжлийн банкны техникийн туслалцааны дэмжлэгтэйгээр хэрэгжиж байгаа “Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох төсөл”-тэй хамтран зохион байгуулагдаж байгаа ба төслийн зохицуулагч Г.Пүрэвсүрэн, төслийн ажилтан Б.Болор-Эрдэнэ нар ажиллаж байна. Маргааш /2019.09.06/ танхимын болон ажлын байран дахь сургалтаар үргэлжлэх болно.
