Мэндчилгээ

Монгол Улсад улсын бүртгэлийн алба байгуулагдсаны 77 жилийн ой, “Улсын бүртгэлийн ажилтны өдөр”-ийг тохиолдуулан оюуны өмч, улсын бүртгэлийн байгууллагыннийт ажилтан, албан хаагчид, үе үеийн ахмадууд Та бүхэндээ чин сэтгэлийн халуун мэндчилгээг дэвшүүлье. 

Тэртээх 1940 онд  цагдан сэргийлэх газрын харъяанд паспортын хэлтэс байгуулагдсанаар бүртгэлийн байгууллагын үндэс суурь тавигдаж,  эдүгээ шинэ үеийн бүртгэлийн албыг бэхжүүлэн хөгжүүлж, биеийн давхцахгүй өгөгдлөөр баталгаажсан иргэний бүртгэл, өмчийн олон хэлбэр бүхий эд хөрөнгийн эрхийн бүртгэл, эдийн засгийн үндсэн суурь болох хуулийн этгээдийн бүртгэл, улс орны хөгжлийн түлхүүр болсон оюуны өмчийн эрхийн бүртгэлийн үйлчилгээг боловсронгуй болгож, олон улсын нийтлэг жишгийн дагуу өргөжүүлэн хөгжүүлэх үйлсийг  Та бүхэнтэйгээ хамтдаа бүтээж байгаадаа сэтгэл нэн таатай байна.   

Манай салбарынхны хуулиар хүлээсэн үндсэн үүрэг нь иргэд, аж ахуйн нэгж, төрийн захиргааны байгууллагад шинээр үүсч байгаа аливаа эрхийг баталгаажуулан, өөрчлөлт, дуусгавар болох үйл явцыг нь эрх зүйн хүрээнд бүртгэж, төрийн ой санамжийг бүрдүүлж, аюулгүй байдлыг  хамгаалах үйл ажиллагаа билээ.  

Энэ хүрээнд улсын бүртгэлийн салбарын хууль эрх зүйн орчныг боловсронгуй болгох, орчин үеийн техник, технологид суурилсан онлайн системийг нэвтрүүлж, улсын бүртгэлийн мэдээллийн баазуудыг нэгтгэх, улмаар нэгдсэн сангуудыг бүрдүүлж, төрийн бүртгэлийн үйлчилгээг ил тод, шуурхай, хүртээмжтэй  болгох чиглэлд хийж хэрэгжүүлсэн  ажлын ололт, амжилтаар 77 жилийн ойтойгоо золгож байна. 

Өнөөдөр улсын хэмжээнд 80 гаруй төрлийн бүртгэлийн үйлчилгээг иргэн, аж ахуйн нэгж байгууллагад үзүүлж, түүнд суурилсан мэдээллийн санг үүсгэн, нийтийн хүртээл болгон ажиллаж байгаа билээ. Уг сан нь Монгол улсын хамгийн том дата бааз бөгөөд 60 орчим теребайт хэмжээтэй 37 мэдээллийн сан, 400 гаруй офлайн дэд сан, сонгуулийн 2082 файл хэлбэрийн сан, 42 нэр төрлийн програм хангамж, 21 аймаг, 9 дүүрэг, 380 сум, 152 хороо, гадаад улсад суугаа элчин сайдын яамд, консулын газруудыг хамран бүрдэж, ажиллаж, ашиглагдаж байна. 

Төрөөс бодлогоо болгон тавьж байгаа цахим засаглалын үйл ажиллагааг дэмжиж, Засгийн газрын түвшинд хэрэгжих “Нэг иргэн-Нэг бүртгэл” хөтөлбөр болон түүний дэд хэсгүүд  болох “Үндэсний ой санамж -1”, “Үндэсний ой санамж -2”,“Үндэсний ой санамж -3” төслүүдийг  эцэслэн боловсруулж, үйл ажиллагааг эхлүүлээд байгааг дуулгахад таатай байна. Уг хөтөлбөрүүд хэрэгжсэнээр төрийн үйлчилгээг ил тод, шуурхай, хүртээмжтэй, цаасгүй, хүнд сурталгүй хүргэж, цахим засаглалыг бодитой хэрэгжүүлэх нөхцөл бүрдэх юм. 

 Үйлчилгээний хүртээмж, шуурхай байдлыг нэмэгдүүлэх чиглэлд ахиц, дэвшил гарч байна. Үйлчилгээний хураамжийг цахим төлбөрийн системээр дамжуулдаг болсны дээр хилийн чанадад ажиллаж, амьдарч байгаа иргэдэд үзүүлэх үйлчилгээг  шуурхай болгож, хөдлөх эд хөрөнгө болон эдийн бус хөрөнгийн барьцааны мэдэгдлийн бүртгэлийн системийг бий болгож, хуулийн этгээдийн бүртгэлд онлайн үйлчилгээг нэвтрүүлээд байна. 

Цаашид Монгол Улсын төр засгийн бодлого, зорилтын хүрээнд “Нэг иргэн, нэг бүртгэл” хөтөлбөр хэрэгжүүлэх замаар улсын бүртгэлийн үйл ажиллагааг боловсронгуй болгох, бүртгэлийн үйл ажиллагааг онлайн горимд бүрэн шилжүүлж, үндэсний цахим баримт бичгийн хэрэглээг нэмэгдүүлэх, төрийн үйлчилгээг жигд тэгш авах нөхцөлийг бүрдүүлэх зэрэг томоохон ажлыг шат дараатай хэрэгжүүлэхээр төлөвлөж байна. 

 Энэ бүхнийг хэрэгжүүлэхдээ шударга ёс, хууль дээдлэх зарчмыг баримталж, төрийн албаны ёс зүйн хэм хэмжээг чанд сахиж, хуулиар хүлээсэн үүргээ гүнээ ухамсарласан албан хаагчдыг төлөвшүүлж, салбарын хэмжээнд хариуцлага, сахилгыг дээшлүүлж ажиллах нь зүй ёсны хэрэг болно оо.  

Төрийн өмнө хуулиар хүлээсэн үүргээ нэр төртэй биелүүлж, бүртгэлийг төгөлдөршүүлэх их үйлсэд оюун ухаан, хүчин чармайлтаа дайчлан ажиллаж байгаа салбарын нийт хамт олондоо ажил хөдөлмөрийн өндөр амжилт хүсч, аз жаргал, эрүүл энх, сайн сайхан бүхнийг хүсэн ерөөе.

Та бидний санасан, зорьсон бүхэн сэтгэгчлэн бүтэх болтугай. 

ОЮУНЫ ӨМЧ, УЛСЫН БҮРТГЭЛИЙН ЕРӨНХИЙ ГАЗРЫН

ДАРГА                 Р.СОДХҮҮ

Видео мэдээ

ХАРИЛЦАХ

Засгийн газрын хэрэгжүүлэгч агентлаг - Оюуны өмч, улсын бүртгэлийн ерөнхий газар 14171 Улаанбаатар хот, Сүхбаатар дүүрэг, Цагдаагийн гудамж
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890, 320502 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт