Казакстан Улсаас Монгол Улсад суугаа Элчин сайдын яамны консулыг хүлээн авч уулзав

Сүүлийн үед гадаад паспорт, төрсний, гэрчилгээ, хүүхдийн хавсралт үнэмлэхийг хуурамчаар үйлдэж, хил давуулах явдал цөөнгүй гарч байгаа билээ. Тэр дундаа Казак иргэд Казакстан улсын квотод хамрагдах зорилгоор уг хэргийг үйлдэх нь ихсэж байна.

Иймд энэхүү хууль бус үйлдлийг таслан зогсоож, цаашид ийм төрлийн хэрэг гаргуулахгүй тал дээр тус газраас ихээхэн анхаарч хэд хэдэн тодорхой ажлыг зохион байгуулж хийхээр төлөвлөөд байгаа юм. Үүний хүрээнд өнөөдөр Бүгд Найрамдах Казакстан улсаас Монгол улсад суугаа элчин сайдын яамны консул Сакэн Таукэлыг тус газрын зарим удирдлагууд хүлээн авч уулзлаа. 

Уулзалтын эхэнд тус газрын Бүртгэл, хяналтын газрын дарга сүүлийн жилүүдэд манай иргэд гадаадад гарч хөдөлмөр эрхлэх болсонтой холбогдуулан хуурамч иргэний баримт бичиг үйлдэх зөрчил ихээр гарах болсон. Уг зөрчлийн ихэнхи хувийг Казак иргэд үйлдэж байна. Тэд 2005 оноос өмнөх хүчингүй болсон паспортыг худалдаж авна хэмээн сонин, чатаар зар тавьж, улмаар худалдаж авсан, хүчингүй болсон паспортын зураг, нэрийг нь өөрчилж байна . Түүнчлэн төрсний гэрчилгээ, хүүхдийн хавсралт үнэмлэхийг мөн хуурамчаар хийх болсон тухай ярьж, энэхүү хууль бус үйлдлийг таслан зогсоох талаар тодорхой ажил зохиож, тэдэнд ногдох хариуцлагыг чангатгах, хууль, эрх зүйн орчинг шинэчлэн сайжруулахад та бүхний хамтын ажиллагаа чухал байна гэлээ. Харин Консул Сакэн Таукэл хэлэхдээ сүүлийн үед энэ асуудал бидний анхаарлыг их татаж байгаа бөгөөд Казакстан Улсаас үүнийг анхааралдаа авч хатуу бодлого барьж байна. Тус Улсын 3 хотод Монголын Казак иргэд ихэвчлэн суурьшдаг. 


Эдгээр иргэдийн бичиг баримтын асуудал шийдэгдээгүй хэцүү байдаг тул цагаачдын албанаас бичиг баримтыг нь шалгах шат дараалсан шалгалтыг хийж байгаа тухай ярьж байсан. Мөн тэрээр танай улсын бичиг баримтын загвар тус улсын цагаачдын албанд байдаггүйгээс Монгол улсын иргэдийн бүрдүүлэн ирж буй бичиг баримтын хуурамч, эсэхийг тодорхойлж чадахгүй хүндрэлтэй байдаг гээд төрсний гэрчилгээ, гадаад паспортын загварыг өгөхийг хүссэн юм. Уулзалтаар Монгол Улсын харъяат Казак иргэд Казакстан улс руу баримт бичгийг хуурамчаар үйлдэж, хууль бусаар хил гаргаж буй зөрчил, түүний шалтгаан нөхцлийг арилгахад хамтран ажиллах, түүнчлэн Монгол Улсаас Казакстан Улсын иргэн болохоор өргөдөл өгсөн, квотод хамрагдсан /тэтгэмж/ манай улсын харъяат иргэдийн талаар тус газраас архивын лавлагаа авч шийдвэрлүүлж байхын зэрэгцээ тус улсын харъяат болж буй Казак иргэдийн талаарх мэдээллийг сар, улирал, жилээр ирүүлж байхаар тохиролцоод цаашид хамтран ажиллахаар болов. Дашрамд дурдахад Казакстан улсын Кустанай, Павлодар, Караганда хотуудад Монголын казак иргэд ихэвчлэн суурьшдаг байна. Гадаадад амьдарч байгаа Казак үндэстэн албан ёсоор 1 сая 500 мянга, албан бусаар 2 сая хүн амьдардаг гэсэн судалгаа байдаг аж. 

Тус Улсын нийт хүн амын 40 хүрэхгүй хувь нь Казак үндэстэн байсан учир 1990 оноос өмнө гадаадад амьдарч байсан Казак үндэстнийг тус улс руу татах зорилгоор тодорхой хэмжээний дэмжлэг буюу квот үзүүлэхээр болсон байна. Ингэхдээ заавал гэр бүл байх ёстой гэсэн шаардлага тавьдаг. Гэр бүлийн нэг хүн бүрд 1000 ам.доллар боло бусад мөнгөн тэтгэлэг үзүүлдэг аж. Ийнхүү гадаад улсаас ирсэн Казак иргэдэд эх оронд нь тодорхой хэмжээний газар өгч, мөнгөн тусламж, дэмжлэг үзүүлснээр одоо Казакстан улс хүн амынхаа 60 хувийг Казак үндэстэн болгож чадсан байна.

Видео мэдээ

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо /АНУ-ын элчингийн чанх хойно /
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890, 320502 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт