Орон нутгийн бүртгэлийн ажилтнуудын ажлын арга барилыг боловсронгуй болгох, мэргэшлийн ур чадварыг дээшлүүлэх, туршлага солилцох зорилго бүхий 2015 оны ээлжит хойд бүсийн сургалт семинар энэ сарын 19-нөөс 21-ний өдрүүдэд Хөвсгөл аймагт амжилттай болж өндөрлөлөө.
Улсын бүртгэлийн ерөнхий газрын дарга Ц.Пүрэвдорж сургалтын арга хэмжээг нээх үеэр та бид иргэнд суурилсан төрийн бүртгэлийн үнэн бодитой ой санамжийг бий болгох, төр, иргэнийг холбосон бүртгэлийн нэгдсэн тогтолцоог бүрдүүлж, төрийн бүртгэлийн үйлчилгээгээр Монгол Улсын иргэдийнхээ эрхийг хангахаар шамдан ажиллаж мэдэгдэхүйц амжилтыг гаргасан. Энэ нь Улс орны эдийн засгийн тогтвортой байдлыг хангах, цаашлаад эдийн засгийн өсөлтийг нэмэгдүүлэхэд суурь үзүүлэлт, дэмжлэг болж байгааг дурдахад таатай байна гэлээ.
Сургалтын эхний өдөр орон нутаг дахь улсын бүртгэлийн байгууллагын өнөөгийн байдал, бодлого, стратеги төлөвлөлт, цаашид хэрэгжүүлэх арга хэмжээ, хүний нөөцийн хөгжлийн хөтөлбөрийн хэрэгжилт, мэдээллийн ил тод байдал, бүртгэлийн зөрчил, шалтгаан, түүнээс урьдчилан сэргийлэх, бүртгэлийн үйл ажиллагаанд мөрдөж буй эрх зүйн актыг нэг мөр ойлгох, цахим мэдээллийн аюулгүй байдал, анхаарах зүйлс нэгдсэн портал систем буюу e-office системийн талаар ерөнхий газраас оролцож буй холбогдох мэргэжилтнүүд танилцуулга, мэдээлэл өгсөн юм. Харин сургалтын хоёр, гурав дахь өдрүүдэд салбар нэгжүүд болох иргэн, эд хөрөнгө, хуулийн этгээдийн бүртгэлийн үйл ажиллагаанд мөрдөгдөж буй эрх зүйн актуудын шинэчлэл, ач холбогдол түүний хэрэгжилтээс гадна архивын баримтын цахимжуулалт, түүнийг хэрэглээнд ашиглах, иргэний бүртгэлийн архивын хадгалалт хамгаалат, ашиглалт, сэлбэн засалт зэрэг өргөн цар хүрээг хамарсан сэдвийн хүрээнд ерөнхий газрын салбар нэгжийн сургагч багш нар удирдан зааж явууллаа. Өмнө хил залгаа оршдог нэг бүсийн мэргэжил нэгтнүүд бүс бүсээрээ цуглаж өөр хоорондоо танилцан, харилцан ажлын арга барил, туршлагаа солилцдог байсан бол энэ удаад төв, урд, говийн бүсийн аймгууд Хойд бүсэд нэгдэж оролцсоноороо онцлог боллоо. Тодруулбал, эл хойд бүсийн сургалтанд Говь-Алтай, Өвөрхангай, Өмнөговь, Завхан, Төв аймгийн улсын бүртгэлийн хэлтсийн нийт 140 гаруй албан хаагч хамрагдан оролцов. Улсын бүртгэлийн ерөнхий газрын орон нутгийн ээлжит энэхүү бүсийн сургалт семинар ирэх сараас үргэлжлэн төвийн бүс Орхон аймаг, зүүн бүс Дорноговь аймаг, баруун бүс Баян-Өлгий аймагт тус тус зохион байгуулагдах юм. Мөн энэ үеэр албан хаагчдын дунд авхаалж самбаа, хурд хүчийг сорьсон спортын буухиа, усан волейбол, сагсан бөмбөгийн тэмцээнийг зохион байгууллаа. Тэмцээний нийлбэр оноогоор Завхан аймгийн Улсын бүртгэлийн хэлтсийн баг тамирчид нэгдүгээр байр, удаах байрыг Говь-Алтай аймгийн баг тамирчид эзэлсэн бол Өмнөговь аймгийн баг тамирчид гуравдугаар байрт шалгарлаа.
