БНСУ-ын “КОЙКА” Олон улсын хамтын ажиллагааны байгууллагын төлөөлөгч О Гюү Чол болон “MarkAny” компанийн захирал Чэ Жон Үг нарыг Улсын бүртгэлийн ерөнхий газрын дэд дарга Р.Даваадорж, Мэдээлэл технологийн газрын дарга М.Алтанзүрх нар хүлээн авч уулзав.

Уулзалтаар талууд Солонгос болон Монгол улсын төрийн байгууллага хоорондох мэдээлэл солилцоо, мэдээллийн нууцлалын талаар туршлага солилцсоноос гадна “КОЙКА” Олон улсын хамтын ажиллагааны байгууллагаас тус газарт хэрэгжүүлсэн төсөл хөтөлбөр, цаашид хамтран ажиллах боломжийн талаар харилцан санал бодлоо хуваалцлаа. Энэ үеэр тус газрын дэд дарга Р.Даваадорж бүртгэлийн байгууллага нь Монгол Улсын иргэн бүрт хүрч ажилладаг онцлогтой байгууллага. Тиймээс КОЙКА-аас хэрэгжүүлсэн энэхүү төслийн үр шимийг Монгол Улсын 3 сая иргэн бүр хүртэж байгаа нь ихээхэн ач холбогдолтой гэдгийг онцлон хэлсэн юм. БНСУ-ын Олон улсын хамтын ажиллагааны байгууллага нь иргэний бүртгэл, хуулийн этгээдийн бүртгэлийн цаасан суурьт эх нотлох бичиг баримтыг цахимжуулах “Улсын нэгдсэн бүртгэл, мэдээллийн системийг сайжруулах Цахим архив төсөл”-ийг санхүүжүүлэн хэрэгжүүлсэн бөгөөд төсөл хэрэгжсэнээр тус газар нь Монгол Улсад үйл ажиллагаагаа явуулж байгаа 30 орчим агентлагийн дотор цахимжуулалтын түвшингээрээ тэргүүлж байгаа билээ.