Өнгөрсөн цагийн түүх, өнөө цагийн дэвшил, ирээдүй цагийн хөгжил гурван цагийн хэлхээ үе уламжлан ирсэн дэлхийд ганц Монгол наадмаа эх сайхан орондоо болон дэлхийн өнцөг булан бүрт тэмдэглэн суугаа түмэн олондоо, Улсын бүртгэлийн байгууллагыг хөгжүүлж ирсэн үе үеийн ахмад буурлууд, эдүгээ тэдний түүчээ болон ажиллаж байгаа ажилтан, албан хаагчиддаа Их Монгол Улс байгуулагдсаны 809, Ардын хувьсгалын 94 жилийн ой, Үндэсний их баяр наадмын халуун мэндчилгээг өргөн дэвшүүлье.

Мөнх хөх тэнгэр, мөрөн гол, өндөр уулс, өргөн тал хараа хүртэл цуцах эх сайхан оронд минь өвс ногоо нь жигдэрч, өнгөтэй сайхан дэлгэр цаг айлчлан ирж хүн бүрийн сэтгэл уудам тал шигээ уужим байна. Үндэсний их баяр наадам бол Монгол түмний халуун түүх, гэгээн хүсэл, хамтын хүчийг илтгэсэн язгуур эрдэнэ билээ. Дэлхийд төрийн дэг, хуулийн засаглал, ёс журам тогтоож явсан өвөг дээдсийн маань харвасан сумны эрч хариагүй, унасан хүлгийнх нь шандас аргамаг, зоригт баатруудынх нь сүр хүч хэвээр байгааг энэ цагийн Монгол наадам уламжлан харуулдаг аа. Эр бяраараа эзэн нь байж, эрмэг хурдаараа эрэлхэг нь байж, эрхий мэргэнээрээ түрүүнд нь байж, дэлгэр зуны налгар талдаа дэнж хотойтол сайхан наадаарай.

УЛСЫН БҮРТГЭЛИЙН ЕРӨНХИЙ ГАЗРЫН ДАРГА Ц.ПҮРЭВДОРЖ