Бүртгэлийн зөрчил, түүнээс урьдчилан сэргийлэх ажлын хүрээнд Бүртгэлийн хяналтын газраас Чингэлтэй дүүргийн бүртгэлийн хэлтсээс дүүргийн 1, 4, 19 хороодын улсын бүртгэгч нарын дунд зохион байгуулсан сургалтанд оролцож, мэргэжил арга зүйн зүйн зөвлөгөө өгөв.

Сургалтаар тус газрын хяналтын улсын ахлах байцаагч Ж.Чиймаа, Л.Баатар нар иргэн, хуулийн этгээдийн бүртгэлийн түүхэн замнал, хуулийн этгээд шинээр байгуулсан, нэмэлт, өөрчилсөн, татан буулгасан бүртгэлийн талаар танилцуулга мэдээлэл хийв. Мөн иргэний бүртгэлийн архивт хадгалагдаж байгаа ХААТР маягтын нэршил, хоёрдагч бүртгэл буюу овог, эцэг/эх/-ийн нэр, нэр өөрчилсний, үрчилсний, эцэг тогтоосны, засвар өөрчлөлтийн бүртгэлийн зэрэг иргэний гэр бүлийн байдлын бүртгэлийн онцлог шинж чанар, бүртгэлийн үйл ажиллагаанд илэрч байгаа алдаа, зөрчил дутагдал, цаашид бүртгэл хийхэд улсын бүртгэгчийн зүгээс анхаарах асуудлын талаар заавар, чиглэлийг өглөө.