Хуулийн этгээдийн улсын бүртгэлийн тухай хууль шинэчлэн батлагдсантай холбогдуулан тус газраас МТШХХТГ-тай хамтран Цахим засаг үндэсний хөтөлбөрийн хүрээнд хуулийн этгээдийн улсын бүртгэлийг онлайнаар мэдүүлэх, хуулийн этгээдийн мэдээлэл болон гэрчилгээг цахим хуудсаар дамжуулан нийтэд мэдээлэх, харах агуулга бүхий вэб хуудсыг боловсруулж, нэвтрүүлээд байна.

МТШХХТГ-аас хэрэгжүүлж буй “Төрийн байгууллагуудын мэдээллийг нэгдсэн өгөгдлийн сантай холбох систем хөгжүүлэх” төслийн хүрээнд жишиг үйлчилгээнүүдийг цахим хэлбэрт шилжүүлэх ажилд “Инносольюшн” ХХК хамтран гүйцэтгэсэн бөгөөд тус газраас иргэдэд үзүүлдэг хуулийн этгээдийн үйлчилгээний онлайн вэб порталыг ашиглалтанд оруулаад байна. Өөрөөр хэлбэл улсын бүртгэлийн байгууллагын цахим хуудсаар дамжин орж хуулийн этгээдийн нэрийг онлайнаар шинээр авах, хуулийн этгээдийг шинээр үүсгэн байгуулах, хуулийн этгээдийн мэдээлэлд нэмэлт өөрчлөлт оруулах, үйлчилгээний дарааллыг урьдчилан захиалах хүсэлт хүлээн авах зэрэг үйлчилгээг онлайнаар илгээх боломжтой боллоо. Иймд энэхүү вэб хуудасын нүүрэнд хэсгийн зүүн дээд хэсэгт байрлах “ХУУЛИЙН ЭТГЭЭДИЙН ЦАХИМ БҮРТГЭЛ” гэсэн товчийг дарж зааврын дагуу онлайн үйлчилгээ мэдүүлэхээс гадна компанийн талаарх мэдээллээ харах бүрэн боломжтой. Дашрамд дурьдахад тус газар нь “Цахим засаг” үндэсний хөтөлбөрийг хэрэгжүүлэхэд төрийн үйлчилгээг цахимжуулж төрийн үйлчилгээг хүртээмжтэй, шуурхай, хүнд сурталгүй хүргэх зорилгоор олон төсөл, арга хэмжээг хэрэгжүүлэн ажиллаж байгаагийн нэг энэхүү хуулийн этгээдийн бүртгэлийн онлайн мэдүүлгийн үйлчилгээ юм.