Өнгөрсөн оны үйл ажиллагааны үр дүнгийн гэрээ, төлөвлөгөөний биелэлт, ажлын ололт амжилтаа бататган дүгнэн, анхаарах шаардлагатай асуудлаа хэлэлцэж цаашид хийж, хэрэгжүүлэх ажлаа ярилцдаг уламжлалтай Улсын бүртгэлийн байгууллагын төв, орон нутгийн удирдах ажилтны нэгдсэн сургалт, зөвлөгөөн амжилттай болж өндөрлөлөө.

Зөвлөгөөний эхний өдөр Бүтээмжийн тухай ойлголт, байгууллагын төгөлдөршил, Эрсдэлийн удирдлагын тогтолцоог нэвтрүүлэх нь, Хууль зүйн сайдын эрхлэх асуудлын хүрээний агентлаг, байгууллагын эрсдэлийн үнэлгээ хийх аргачлал, Албан хэрэг хөтлөлт, Хүний нөөцийн бодлого, Хүний эрхэд суурилсан хандлага, Авлига, ашиг сонирхлын зөрчлөөс урьдчилан сэргийлэх зэрэг сэдвийн хүрээнд төрийн болон төрийн бус байгууллагын холбогдох албан тушаалтан, сургагч багш нар оролцож шаардлагатай мэдээлэл, танилцуулга хийлээ. Зөвлөгөөний дараагийн өдрүүдэд Улсын бүртгэлийн ерөнхий газрын газар, хэлтсүүдийн дарга нар эрхлэх асуудлынхаа хүрээнд өнгөрсөн онд хийсэн болон цаашид хийх ажлын төлөвлөгөө, дэвшүүлсэн зорилтуудынхаа талаар илтгэл тавихаас гадна анхаарах асуудлуудаар зөвлөмж, чиглэлийг өгөв. Түүнчлэн уламжлал ёсоор улсын бүртгэлийн үйл ажиллагаанд гарч буй зөрчил, алдаа дутагдал, шийдвэрлэхэд хүндрэлтэй асуудлууд, 2015 оны бүртгэлийн албаны төлөвлөгөөт ажлыг хэрэгжүүлэн ажиллахад анхаарах асуудлуудын талаар удирдах ажилтнууд хамтран санал бодлоо солилцож, хэлэлцүүлэг өрнүүллээ. Улсын бүртгэлийн байгууллагын удирдах ажилтны ээлжит сургалт, зөвлөгөөнд тус газрын удирдлагуудаас гадна төв, орон нутгийн Улсын бүртгэлийн хэлтсийн дарга нар, холбогдох мэргэжлийн байгууллагын төлөөлөл нийт 80 гаруй хүмүүс оролцлоо. Гурван өдрийн турш үргэлжилсэн Улсын бүртгэлийн байгууллагын удирдах ажилтны нэгдсэн сургалт, зөвлөгөөний дараа УБЕГ-ын даргатай нийслэл, аймгуудын газар, хэлтсийн дарга нарын 2014 онд байгуулсан ажлын үр дүнгийн гэрээг дүгнэх, шагнал гардуулах, 2015 оны үр дүнгийн гэрээ байгуулах ёслолын ажиллагаа боллоо.