“Эд хөрөнгө өмчлөх эрх болон түүнтэй холбоотой эд хөрөнгийн бусад эрхийн улсын бүртгэлийн тухай хуулийн шинэчилсэн найруулгын төсөл”-ийг Хууль зүйн яамнаас боловсруулан төрийн болон төрийн бус байгууллагууд, холбоод, иргэдийн саналыг авахаар өнөөдөр Хууль зүйн үндэсний хүрээлэнд хэлэлцүүлэг зохион байгууллаа.

Энэхүү арга хэмжээг Хууль зүйн яамны Төрийн нарийн бичгийн дарга Ж.Баярцэцэг нээж үг хэлэхдээ хөрөнгийн бүртгэлийг шуурхай, цахимаар бүртгэдэг тогтолцоог нэвтрүүлэх, иргэдэд нээлттэй болгох цогц арга хэмжээ авах нь хуулийн гол үзэл баримтлал гэдгийг онцлов. Мөн энэ үеэр Эд хөрөнгийн эрхийн бүртгэлийн газрын дарга Н.Туяа хуулийн үзэл баримтлалын талаар товчхон танилцуулсан юм. Уг хуулийн төсөлд эд хөрөнгийн бүртгэлийн үйл ажиллагааны эрх зүйн зохицуулалтыг уян хатан, түргэн шуурхай, нээлттэй болгох чиглэлээр бүртгэлийн үйл ажиллагааг цахим хэлбэрээр авах тогтолцоог бүрдүүлэх, эд хөрөнгийн бүртгэлийн зарим мэдээлэл иргэдэд нээлттэй болгох зэрэг зарчмын шинжтэй өөрчлөлтүүдийг тусгаж байна. Хуулийн төсөл батлагдснаар цахим бүртгэлийн үйл ажиллагаа нэвтэрч иргэд хурдан шуурхай, чирэгдэлгүйгээр үйлчилгээ авах боломж бүрдэх юм. Хэлэлцүүлэгт тус газрын эд хөрөнгийн эрхийн бүртгэлийн газрын холбогдох хүмүүс болон төрийн болон төрийн бус байгууллагууд, холбоод, иргэдийн нийт 70 гаруй төлөөлөл оролцлоо.