Хууль зүйн яам түүний харъяа агентлагуудын “Нээлттэй хаалганы өдөр” өнөөдөр Чингисийн талбайд боллоо. Өдөрлөгийг нээж Хууль зүйн сайд Х.Тэмүүжин үг хэлж, харъяа агентлаг, газрын дарга нар иргэдэд үзүүлж буй үйлчилгээ болон байгууллагуудын үйл ажиллагаатай танилцлаа.

Энэ өдөр агентлагууд чиг үүргийнхээ дагуу эрхзүйн шинэчлэлийн хүрээнд хийж буй ажил, үйл ажиллагааныхаа талаар иргэдэд мэдээлэл өгөхөөс гадна зарим үйлчилгээнүүдийг шуурхай үзүүллээ. Тухайлбал, УБЕГ-аас иргэн, эд хөрөнгө, хуулийн этгээдийн бүртгэлтэй холбоотой зарим үйлчилгээг иргэдэд нэг цэгээс шуурхай үзүүлсэн юм. Тус өдөр улсын бүртгэлиин үйлчилгээг нийт 3150 гаруй иргэнд үзүүллээ. Үүнээс хаяж үрэгдүүлсэн 865 иргэний цахим үнэмлэхийн захиалга хүлээн авч өдөрт нь буцаан олгосон бол архивын лавлагаа 192, гадаад паспортын хүчинтэй хугацааны сунгалт 341, гадаад паспорт шинээр авах материал мэдүүлгийн хуудас 134, гадаад паспортын хүчингүй үйлчилгээ 7, төрсний болон гэрлэлтийн гэрчилгээний дахин олголт 32, хуулийн этгээдийн бүртгэлийн үйлчилгээг 7, эд хөрөнгийн эрхийн бүртгэлийн үйлчилгээг 38 иргэнд тус тус үзүүлж ажиллав. Мөн улсын бүртгэлийн хууль тогтоомж, үйл ажиллагаа, үйлчилгээ, баримт бичгийн бүрдүүлэлтийн 10 гаруй төрлийн гарын авлага, брошур, ном, товхимолыг нийт 1500 гаруй иргэнд тарааж, мэдээлэл зөвлөгөө өгчээ. Түүнчлэн иргэдийн өргөдөл, гомдол санал хүсэлтийг хүлээн авч шуурхай шийдвэрлэлээ. Нээлттэй хаалганы өдрөөр иргэдэд үйлчилгээ , зөвлөгөө мэдээлэл өгөхөөс гадна “Эрх зүйн шинэчлэл”, “Түмэнд хүрсэн төрийн үйлчилгээ”, “УБЕГ 2013-2014 онд цаг үе, үйл явдал”, “Түүхэн баримт бичиг”, “УБЕГ-ын үйлчилгээний тоон мэдээ” зэрэг үзэсгэлэнгийн самбар гаргаж, үүгээрээ дамжуулан улсын бүртгэлийн хууль тогтоомж, түүний хэрэгжилт үйл ажиллагааг иргэд олон нийтэд сурталчлан таниулав. Улсын бүртгэлийн ерөнхий газрын хувьд энэ өдөр ачаалалтай олны хөлд дарагдсан хэдий ч дотоод зохион байгуулалтын арга хэмжээ авч, хүн хүчээ нэмэгдүүлэн дээрх бүх иргэдэд үйлчилгээг шуурхай хүртээмжтэй хүргэж өгсөнд иргэд сэтгэл хангалуун байсан юм.