Монгол Улсын засгийн газраас мэдээллийн технилоги хурдастай хөгжиж буй өнөө үетэйгээ хөл нийлүүлж, иргэддээ хурдан шуурхай төрийн үйлчилгээг хүргэх зорилготойгоор "ТҮЦ машин"-ыг нэвтрүүлж эхэлсэн.

Тэгвэл өнөөдөр Улаанбаатар хотод дахин шинээр төрийн үйлчилгээний 59 ТҮЦ машин суурилагдаж нээлтээ хийлээ. Цахим машины тусламжтайгаар иргэд өмнө нь 18 төрлийн үйлчилгээ авч байсан бол одоо орон даяар суурилагдаад байгаа нийт 108 ТҮЦ машинаас 20 төрлийн үйлчилгээ авахаар боллоо. Тодруулбал ТҮЦ машинд хуруугаа уншуулан цахим үнэмлэх дахин авах хүсэлтээ зааврын дагуу захиалж болхоос гадна өөрийн нэр дээр аж ахуй нэгж бүртгэлтэй эсэх талаарх лавлагааг хурууны хээгээ уншуулан авах боломжтой болж байгаа юм . Хаяж, үрэгдүүлсэн цахим үнэмлэхээ хороондоо биечлэн очиж хүсэлтээ гаргахын зэрэгцээ төлбөр хураамжаа банкинд тушааж хугацаа алддаг байсан. Харин одоо ТҮЦ машинаас захиалаад зогсохгүй аль ч банкны картаар төлбөр тооцоогоо хийх бүрэн боломжтой боллоо. Мөн хуулийн этгээдийн улсын бүртгэлтэй эсэх лавлагааг авахын тулд иргэн 5000 төгрөг төлж ажлын 7 хоног зарцуулдаг байсан бол одооноос бусад лавлагааны адил мөн хурууны хээгээ уншуулан үйлчилгээний хураамж 1000 төгрөгийг төлөөд шууд авна. Энэ нь иргэдийн цаг зав болоод эдийн засгийг хэмнэж байгаагаараа ихээхэн давуу талтай. Мэдээллийн технологи, шуудан, харилцаа холбооны газраас Улаанбаатар хотод 80, хөдөө орон нутгуудад 28 ширхэг ТҮЦ машин байршуулсан байгаа бөгөөд улсын бүртгэлийн 10 төрлийн лавлагаа, үйлчилгээг уг машинаар дамжуулан хүргэж байна. Тухайлбал, иргэний үнэмлэхийн лавлагаа, Төрсний бүртгэлийн лавлагаа, Оршин суугаа хаягийн лавлагаа, Гэрлэлтийн лавлагаа, Гэрлэлт цуцласан тухай лавлагаа, Гэрлэлт бүртгэлтэй эсэх лавлагаа, Эд хөрөнгийн улсын бүртгэлийн лавлагаа, Хуулийн этгээдийн улсын бүртгэлтэй эсэх лавлагаа, Иргэний үнэмлэх дахин авах хүсэлтээ захиалж байгаагаас гадна Татварын Ерөнхий газар, Гаалийн ерөнхий газар зэрэг байгууллагууд үйлчилгээ хүргэж байгаа билээ.