Монгол Улсын бүртгэлийн ерөнхий газрын дарга Ц.Пүрэвдорж Киргиз Улсын Сангийн яамны дэргэдэх “Мэдээллийн систем”-ийн Улсын аж ахуйн захирал Talant ABDULLAEV тэргүүтэй төлөөлөгчдийг өнөөдөр хүлээн авч уулзлаа. Тэд иргэний шинэчилсэн бүртгэл болоод сонгогчдын бүртгэлийн үйл ажиллагаатай танилцаж, туршлага судлахаар манай оронд айлчилж байгаа юм.
Киргизийн төлөөлөгчдийн тэргүүн хэлэхдээ “Монгол улсын бүртгэлийн байгууллага нь сонгуулийг үр дүнтэй явуулахад асар богино хугацаанд хүн амаа шинэчлэн бүртгэж, хурууны хээ, сонгуулийн автоматжуулсан системийг сонгож тэдгээрийг бүрэн ашиглаж нэвтрүүлж чадсан” хэмээн дүгнэлээ. Энэхүү арга туршлага, түүний эрх зүйн зохицуулалт болон сонгогчдын бүртгэлийн асуудлыг шийдвэрлэсэн байдал зэрэг нь бидний сонирхолыг зүй ёсоор татаж байгаа тул танай арга туршлагыг авч нэвтрүүлэх нь чухал гэж үзэн түүнийг судлах сонирхолтой ирсэн тухайгаа дуулгаад иргэний шинэчилсэн бүртгэлийг хэрхэн ямар хугацаанд явуулсан, иргэний цахим үнэмлэх мөн сонгогчдын бүртгэлийн хурууны хээг нэвтрүүлсэнтэй газар дээр нь танилцах хүсэлтэй байгаагаа илэрхийлээд энэ талаар асууж сонирхов. Улсын бүртгэлийн ерөнхий газрын дарга Киргиз улсын төлөөлөгчдөд хандан Монгол Улсын бүртгэлийн байгууллагаас нэвтрүүлсэн дээрх үйл ажиллагаатай танилцаж, туршлага судлахаар ирсэн явдалд талархаж байгаагаа илэрхийллээ. Тэрээр Монголчууд бид хүн ам цөөхөн ч газар нутгийн хэмжээгээр тархай бутархай суурьшсан нүүдэлчин ард түмэн. Тиймээс ч иргэний шинэчилсэн бүртгэлийн ажлыг эхлүүлэн хүн амаа бүрэн хамруулж шинэчлэн бүртгэхэд хүндрэлтэй асуудлууд байсан ч бид үүнийг төр засаг, системийн нийт ажилтан албан хаагч, төрийн болон төрийн бус байгууллага, хэвлэл мэдээллийн байгууллагуудын хамтын оролцоотойгоор нөр их хөдөлмөрийн үр шимд нийт иргэдийнхээ 90 гаруй хувийг асар богино хугацаанд хамруулан, бүртгэлийн үнэн зөв мэдээллийн баазыг шинэчлэн бий болгож чадсан гэдгийг дурьдлаа. Түүнчлэн иргэний цахим үнэмлэх нэвтрүүлж, сонгогчдын бүртгэлийн хурууны хээ, автоматжуулсан системийг нэвтрүүлэхэд иргэний шинэчилсэн бүртгэл суурь эхлэл байсан төдийгүй ард түмэн, улс орны эдийн засагт ихээхэн чухал үүрэг гүйцэтгэсэн ажил болсныг онцлон хэлээд тэдний сонирхсон асуултуудад хариулж, мэдээлэл өглөө. Үүний дараа тус газрын Иргэний бүртгэлийн газрын албаны хүмүүс тэдний сонирхсон дээрх асуудлуудаар дэлгэрэнгүй танилцуулсан бол Мэдээллийн технологийн газраас мэдээллийн сан, програм хангамжийн талаар газар дээр нь танилцуулж, туршлага судлууллаа. Уулзалтын төгсгөлд Киргиз Улсын төлөөлөгчдийн тэргүүн бид танай орны сонгуулийн байгууллага болоод бүртгэлийн байгууллагаас нэвтрүүлсэн энэхүү томоохон ажлыг судалсны үр дүнд өөрийн улсдаа энэхүү системийг нэвтрүүлж, амьдрал дээр бодитой хэрэгжүүлээд та бүхэнд энэ талаар эргэж дуулгах болно гэлээ. Эцэст нь тэрээр Улсын бүртгэлийн ерөнхий газрын удирлага албаны хүмүүсийг өөрийн улсад айлчилж тус улсын бүртгэлийн албатай танилцахыг уриад хойшид бидний хамтын ажиллагаа улам өргөжинө гэдэгт итгэлтэй байна гэснээр уулзалт амжилттай болж өндөрлөлөө. Киргиз Улсын төлөөлөгчид маргааш Хан-Уул дүүргийн бүртгэлийн хэлтсийн үйл ажиллагаа, иргэний шинэчилсэн бүртгэлийг хэрхэн бүртгэж байгаа ажлын үйл явцтай газардээр нь очиж танилцахаас гадна анхан шатны нэгж дээр сонгуулийг хэрхэн, ямар байдлаар явуулдаг талаар судалж, санал солилцоно.
