Хан-Уул дүүргийн иргэний бүртгэлийн тасгийн үйл ажиллагаа, ажлын арга барил, тэргүүн туршлагыг нийслэлийн бүртгэлийн дүүргүүдийн бүртгэлийн хэлтсийн албан хаагчдад танилцуулах, харилцан туршлага солилцох зорилго бүхий “Үзүүлэх сургалт” өнгөрөгч Баасан гарагт Хан-Уул дүүргийн Иргэдийн Төлөөлөгчдийн Хурлын танхимд боллоо.

Сургалтын эхэнд тус дүүргийн Бүртгэлийн хэлтсийн дарга Д.Бат-Очир дүүргийн Иргэдийн төлөөлөгчдийн хурал, Засаг даргын Тамгын газартай хамтран ажиллаж байгааг болон сургалтын зорилго, онцлогуудын талаар танилцуулсан бол Иргэний бүртгэлийн тасгийн дарга Д. Оюунтуяа 2013, 2014 онуудад хийсэн бүтээлч шинэлэг ажил, тасгийн үйл ажиллагаа, ажлын арга барилын талаар танилцуулга, мэдээлэл хийсэн юм. Үүний дараа сургалтанд оролцогчид хөтөлбөрийн дагуу тус дүүргийн алслагдсан хороо болох 13, онлайн системд холбогдсон 16 дугаар хорооны ажлын алба болон бүртгэлийн үйл ажиллагаанаас гадна эд хөрөнгийн эрхийн бүртгэлийн архивын үйл ажиллагаа, бүртгэлийн өрөө танхимтай танилцаж туршлага хуваалцав. Үзүүлэх сургалтын төгсгөлд Нийслэлийн Улсын бүртгэлийн газрын дарга Б.Байгалмаа үйл ажиллагааг хаан үг хэлж, урилгаар оролцсон Сэлэнгэ, Дорноговь аймгийн хэлтсийн дарга нарт дурсгалын зүйл гардуулснаар сургалт амжилттай болж өндөрлөлөө. Уг сургалтанд УБЕГ, НУБГ-ын удирдлагууд болон нийслэлийн 9 дүүргийн бүртгэлийн ажилтнуудын төлөөлөл нийт 80 гаруй албан хаагчид оролцлоо.