Улсын бүртгэлийн мэдээллийн санг Газрын кадастрын мэдээллийн сантай холбох, харилцан мэдээлэл солилцох, улсын хэмжээнд нэгдсэн мэдээллийн сан үүсгэж төрийн үйлчилгээг иргэн, хуулийн этгээдэд түргэн шуурхай үзүүлэх боломжийг бүрдүүлэх зорилгоор Улсын бүртгэлийн ерөнхий газрын дарга Ц.Пүрэвдорж, Газрын харилцаа, геодези, зураг зүйн газрын дарга А.Хүрэлшагай нар өнөөдөр хамтын ажиллагааны санамж бичигт гарын үсэг зурлаа.

Санамж бичгийг байгуулснаар Улсын бүртгэлийн мэдээллийн нэгдсэн сангийн эд хөрөнгийн бүртгэлийн мэдээллийн сан Газрын кадастрын мэдээллийн сантай холбогдож харилцан мэдээлэл солилцох боломж бүрдэж улмаар иргэнд өмчлүүлсэн газрыг Эд хөрөнгийн улсын бүртгэлд бүртгэж баталгаажуулах, гэрчилгээ олгох үйл ажиллагааны шат дамжлага багасаж, иргэний өмчлөлийн газрын хэмжээ, байршил шаардлагатай бусад мэдээллийг мэдээллийн сангаас улсын бүртгэгч шууд харах боломжтой болох юм. Одоогийн журмаар иргэн өөрийн өмчлөлийн газрын кадастрын зураг, газрын хянан баталгааны дүгнэлтээ газрын албанаас авч, баталгаажуулан бүртгэлийн байгууллагад хандаж бүртгүүлдэг олон шат дамжлага, хүндрэл чирэгдэл багасна гэсэн үг. Мөн иргэн өөрийн үл хөдлөх хөрөнгө, газрыг худалдах, бэлэглэх, өвлүүлэх, барьцаалах зэрэг аливаа хэлбэрээр өөрийн өмч хөрөнгөө захиран зарцуулахад бүртгэлийн байгууллагын зүгээс хурдан шуурхай, чанартай үйлчилгээг үзүүлэх нөхцөл бүрдэж, ингэснээр иргэн үл хөдлөх эд хөрөнгөө эдийн засгийн эргэлтэнд оруулах замаар ахуй амьдралаа дээшлүүлэхэд чухал ач холбогдолтой. Хамтын ажиллагааны санамж бичгийн хүрээнд цаашид эрхлэх асуудлын чиглэлээр хууль, эрх зүйн орчинг боловсронгуй болгох, холбогдох хууль, тогтоомж, дүрэм журмыг өөрчлөн шинэчлэх талаар тодорхой санал боловсруулан шаардлагатай арга хэмжээг авч хэрэгжүүлэхээр төлөвлөөд байна.