Тус газар Улсын бүртгэлийн үйлчилгээг иргэдэд ойртуулж, шуурхай хүргэх зорилгоор Монгол шуудан компанитай хамтарч Үндэсний энгийн гадаад паспортыг баталгаат шуудангаар дамжуулан иргэний өөрийн хүсэлтээр гараас гарт, гэрт нь хүргэх үйлчилгээг нэвтрүүлээд багагүй хугацаа өнгөрч байна.

Тэгвэл өнөөдрийн байдлаар 300 гаруй иргэн уг үйлчилгээг хүртээд байгаа бөгөөд шуудан хүргэлтийн үйлчилгээг сонгон үйлчлүүлэх иргэдийн тоо өдөр өдрөөр нэмэгдэж байна. Иргэний баримт бичгийг гараас гарт хүргэх үйлчилгээ нь нийслэлийн бүх дүүрэгт байршил харгалзахгүй 24 цагийн дотор хүргэгдэж байгаа бөгөөд хот доторх үйлчилгээний хураамж 3500 төгрөг, хөдөө орон нутагт буюу Дархан, Орхон, Сэлэнгэ, Булган, Төв, Хэнтий, Дорнод, Дундговь, Өмнөговь аймгуудад 48 цагийн дотор, 5000 төгрөгийн хураамжийг хүргэлтийн үнэд төлөх юм. Харин бусад аймгийн төвд 72 цагийн дотор иргэний хүсэлтээр захиалсан гадаад паспортыг нь гэр болон ажлын хаягийн дагуу хүргэж өгч үйлчилнэ. Иймээс иргэн гадаад паспорт захиалж, өөрийн хүсэлтээр хүргэлтийн үйлчилгээг сонгосон бол үндсэн үнийн дүнд хүргэлтийн үйлчилгээний хураамжийг нэмж төлнө. Өөрөөр хэлбэл та анх удаа шинээр нэг жилийн хугацаатай гадаад паспорт яаралтайгаар авахаар захиалсан бол /32600/ хот дотор хүргэлт хийлгэвэл 3500 төгрөгийг нэмж төлнө гэсэн үг юм. Улсын бүртгэлийн ерөнхий газар цаашид үл хөдлөхийн гэрчилгээ, хуулийн этгээдийн гэрчилгээ, цахим үнэмлэх зэрэг олон төрлийн бичиг баримтыг "Монгол шуудан"-ын үйлчилгээгээр дамжуулан иргэний хүсэлтийн дагуу хаягаар нь хүргэхээр төлөвлөн ажиллаж байна.