Төрийн үйлчилгээг иргэдэд ойртуулж, хөнгөн шуурхай болгох, хүртээмжийг нь нэмэгдүүлэх зорилгоор тус газар Нийслэлийн Засаг даргын Тамгын газартай иргэний бүртгэлийн зарим төрлийн үйлчилгээг анхан шатны нэгжээс үзүүлэхээр тохиролцож, хамтын ажиллагааны “Санамж бичиг” байгуулсан билээ.

Тэгвэл өнөөдөр иргэний бүртгэлийн 5 төрлийн үйлчилгээг хороонд шилжүүлэх нээлтийн ажиллагаа Хан-Уул дүүргийн 8 дугаар хороонд боллоо. Нээлтэнд нийслэлийн Засаг дарга бөгөөд Улаанбаатар хотын Захирагч Э.Бат-Үүл Улсын бүртгэлийн Ерөнхий газрын дэд дарга Д.Энхцэцэг болон бусад албаны хүмүүс оролцов. Нийслэлийн хороодод өнөөдрийн байдлаар шилжилт хөдөлгөөний, иргэний байнгын оршин суугаа газрын бүртгэл, төрсний гэрчилгээний нөхөн олголтыг хийж байсан бол өнөөдрөөс гэрлэлт, гэрлэлт цуцлалт /шүүхийн журмаар/, гэрлэлт сэргээлт, төрсний болон гэрлэлтийн гэрчилгээний дахин олголтын бүртгэлийг хийхээс гадна иргэний үнэмлэхийн, оршин суугаа хаягийн лавлагааг ийнхүү олгож эхэллээ. Иргэдэд дээрхи төрлийн бүртгэлийн үйлчилгээг анхан шатны нэгж болох хорооноос үзүүлснээр дүүрэгт хийгдэж байгаа бүртгэлийн ачаалал багасах, иргэд дээрхи үйлчилгээг хорооноос хөнгөн шуурхай, чирэгдэлгүй авах нөхцөл боломж бүрдэж байгаа юм. Уг ажлыг зохион байгуулах хамтарсан ажлын хэсэг дээрхи хамтын ажиллагааны санамж бичгийн хүрээнд эхний ээлжинд Улсын бүртгэлийн мэдээллийн нэгдсэн сүлжээнд /иргэний бүртгэлийн онлайн сүлжээ/ СХД-ийн 4, 6, 12, 13, 14, 15, 16, 17, 18, 19, 20, 27, Сүхбаатар дүүргийн 1, 2, 3, 4, 5, 6, 7, 8, 9, 10, 11, 12, 13, Баянзүрх дүүргийн 5, 6, 9, 13, 15, 17, 24, Хан-Уул дүүргийн 1, 2, 3, 4, 5, 6, 7, 8, 10, 11, 15, 16, Чингэлтэй дүүргийн 2, 4, 6, 8, 10, 18-р, нийт 50 хороог шилэн кабелиар холбоод байна. Цаашид иргэн, эд хөрөнгө, хуулийн этгээдийн бүртгэлийн үйлчилгээг хорооноос нэмж үзүүлэх боломж ийнхүү бүрдэж байгаа бөгөөд энэхүү ажлыг үе шаттай хэрэгжүүлэхээр төлөвлөн ажиллаж байна.