Улсын бүртгэлийн ерөнхий газрын архивын ачаалал нэмэгдэж байгаатай холбогдуулан Иргэний баримтын архивын хэлтэс энэ Бямба гарагт 10.00-16.00 цагийн хооронд иргэдэд үйлчилж архивын лавлагаа олгохоор боллоо. Олон хүүхэд төрүүлж өсгөсөн эхийг урамшуулах тухай хуульд заасны дагуу дөрвөн хүүхэд төрүүлсэн эх II, зургаа болон түүнээс дээш хүүхэдтэй бол I зэргийн одон олгохоор хуульчилсан билээ.

Тэгвэл энэхүү шаардлагыг хангасан эхчүүд 3 дугаар сарын 1-ний дотор Халамж үйлчилгээний газарт материалаа бүрдүүлж өгөхтэй холбогдуулан архиваас төрсний болон нас барсны лавлагаа авахаар хандаж буй иргэдийн хөл ийнхүү нэмэгдээд байна. Тус архивын хэлтэс энгийн үед өдөрт 400 орчим иргэнд үйлчилдэг байсан бол одоо ачаалал эрс нэмэгдэж өдөрт дунджаар 600 гаруй иргэнд дээрх төрлийн лавлагаа, мэдээллийг гарган өгч байна. Иймд иргэд лавлагаа авахаар ирэхдээ төрүүлсэн эхийн болон хүүхдийн овог, нэр, хэдэн хүүхэд төрүүлсэн, хүүхдээ хэдэн онд хаана бүртгүүлсэн /тухайн үеийн засаг захиргааны нэрээр/ , хэрэв нас барсан бол нас барсан он сар өдөр, бүртгүүлсэн газар /мөн тухайн үеийн засаг захиргааны нэрээр/ зэргийг зайлшгүй мэдэж ирэх шаардлагатайг анхаарна уу.