Улсын бүртгэлийн ерөнхий газар төрийн үйлчилгээний байгууллагын ил тод, нээлттэй байдлыг хангах, үйчлилгээний талаарх мэдээллийг иргэдэд тасралтгүй, шуурхай хүргэх зорилгоор Монгол Улсын хамгийн өргөн сүлжээ болох Монголын цахилгаан холбоо компанийн “Үндэсний лавлах 19001109” мэдээллийн төвтэй хамтран ажиллахаар гэрээ байгууллаа.

Энэхүү гэрээг байгуулснаар Улсын бүртгэлийн нэгдсэн лавлах 19001890 дугаарын утсыг байнгын тасралтгүй ажиллагаатай болгож, улсын бүртгэлийн үйлчилгээний талаарх мэдээллээр иргэд, олон нийтийг хангах зорилготой билээ. Иргэд улсын бүртгэлийн үйлчилгээний талаарх мэдээллийг тус газрын цахим хуудас болон 19001890 дугаарын лавлах утас, биечлэн ирэх зэргээр авдаг байсан бол одоо илүү өргөн хүрээнд цаг хугацаа, орон зайнаас үл хамааран , ажлын болон амралт, баяр ёслолын аль ч өдрийг харгалзахгүйгээр 24 цагийн турш тогтмол авах бүрэн боломжтой болох юм. Үндэсний мэдээллийн 19001109 лавлах нь Улсын бүртгэлийн ерөнхий газрын хаяг, байршил, цахим хуудас, тус газрын удирдлага, газрын дарга нарын иргэдийг хүлээж авах цагийн хуваарь, өргөдөл, гомдол хүлээн авах албан тушаалтны нэр, утас, хаяг байршилаас гадна газар, хэлтсүүдийн утасны жагсаалт, ажиллах цагийн хуваарь, үйлчилгээний төрөл, бүрдүүлэх баримт бичгийн жагсаалт, үйлчилгээний хөлс, тэмдэгтийн хураамж зэрэг таны хүссэн мэдээллийг дэлгэрэнгүйгээр өгнө. Дашрамд дурдахад тус газар UB лавлах 19001617 мэдээллийн төвтэй гэрээ байгуулж иргэдэд мөн 24 цагийн турш мэдээлэл түгээж эхлээд байгаа билээ. Тэгвэл энэ удаад Үндэсний лавлах 19001109 мэдээллийн төвтэй хамтран ажиллах гэрээ байгуулж, иргэдийг олон суваг, сүлжээгээр дамжуулан улсын бүртгэлийн үйлчилгээний баримт бичгийн бүрдүүлэлт болон бусад шаардлагатай мэдээллээ ойроос, хүртээмжтэй авах нөхцлийг ийнхүү бүрдүүлэхээр бэлтгэл ажлыг эхлүүлээд байна.