Улсын бүртгэлийн ерөнхий газар иргэдэд төрийн үйлчилгээг ойртуулах, улсын бүртгэлийн байгууллагын үйлчилгээний талаарх шаардлагатай зарим мэдээллийг ажлын бус цагаар болон амралтын өдрүүдэд түргэн, шуурхай хүргэх зорилгоор “Улсын бүртгэлийн нэгдсэн лавлах 1890” дугаарын утсаар олон нийтэд хүргэдэг мэдээллийг 24 цагийн турш “UB лавлах 1617” мэдээллийн төвөөр дамжуулан тасралтгүй хүргэж эхэллээ.

Тус газар “Мэдээллийн ил тод байдал ба мэдээлэл авах эрхийн тухай хууль”-д заасны дагуу төрийн байгууллагын ил тод байдлыг хангахтай холбогдсон үйлчилгээний талаарх бүхий л мэдээллийг тус лавлахаар дамжуулан иргэдэд хүргэх нөхцлийг бүрдүүллээ. Тухайлбал, Улсын бүртгэлийн ерөнхий газрын хаяг, байршил, цахим хуудас, тус газрын удирдлага, газрын дарга нарын иргэдийг хүлээж авах цагийн хуваарь, өргөдөл, гомдол хүлээн авах албан тушаалтны нэр, утас, хаяг байршилаас гадна газар, хэлтсүүдийн утасны жагсаалт, ажиллах цагийн хуваарь, үйлчилгээний төрөл, бүрдүүлэх баримт бичгийн жагсаалт, үйлчилгээний хөлс, тэмдэгтийн хураамж зэрэг мэдээллийг UB лавлах 1617 дугаараас авах боломжтой. Тус лавлах ажлын цагаас гадна 17:00 цагаас өглөөний 08:00 цаг хүртэл, 7 хоногийн амралтын өдрүүд буюу Бямба, Ням гарагууд болон нийтээр амрах баярын өдрүүдэд ажиллаж улсын бүртгэлийн үйлчилгээтэй холбогдсон бүх мэдээллийг иргэдэд тогтмол хүргэх юм.